Jas ǵalymdardyń tájirıbe almasý alańy

6 tamyzda Nur-Sultan qalasyndaǵy  Nazarbaev ortalyǵynda ashylǵan  forým jumysyna elimizdiń, sonymen qatar Armenııa, Belorýssııa, Vengrııa, Qytaı, Qyrǵyzstan, Lıtva, Reseı, Tájikstan, Túrkııa, О́zbekstan, Ýkraına jáne Fran­sııanyń jas ǵalymdary qatysyp, ınnova­sııalyq tehnologııalar, ǵylymnyń damýy, jas ǵalymdarǵa jobalaryn iske asy­rýǵa qalaı kómektesýge bolatyny  jó­nin­de pikir almasýda. Osy oraıda  Alma­ty qalasynan kelgen jas ǵalym Nurlan Ospanov óz pikirin taratyp aıtyp berdi. 

– Osyndaı forýmdar jas ǵalymdarǵa pikir almasýǵa zor múmkindik beredi. Qazaqstannyń ǵana emes, shetelderdiń de zertteýshi ǵalymdarymen oı bóli­sip, ǵylym salasyndaǵy túıtkildi máse­le­lerdi, tyń taqyryptardy talqylap jatyrmyz. Ǵylymmen aınalysqanyma segiz jyl boldy. Qazirgi tańda Uly dala eli men Shyǵys elderi arasyndaǵy ertedegi baılanystardy zerttep júrmin. Osy maqsatta Ońtústik Koreıa memleketine baryp, koreı tilindegi biraz qundy de­rek­terdi zertteý jumysyma paıdalandym, – dedi almatylyq jas ǵalym. Al Arme­nııa memleketinen forýmǵa arnaıy kelgen jas ǵalym Gevorg Vardanıan sharany uıymdastyrǵan Elbasy Qoryna zor rıza­shylyǵyn jetkizdi.

Elordadan bastaý alǵan Býrabaıdaǵy basqosýda ǵylymnyń ártúrli baǵyttary boıynsha seksııalyq otyrystar jáne dıskýssııalyq alańdar uıymdastyrylýda.

Shara moderatory – Tuńǵysh Prezıdent – Elbasy Qory atqarýshy dırek­torynyń orynbasary Igor  Rogov bul aýqymdy joba iske asyrylǵannan beri úsh jyldyń ishinde Qazaqstannyń já­ne jaqyn sheteldegi oqý oryndarynyń ara­syndaǵy iskerlik qarym-qatynas keńeı­genin atap ótti.  Is-sharanyń aıasyn­da jas ǵalymdardyń áriptestigi birlesken ǵy­lymı zertteýler júrgizýge yqpal etý­de. 

Forým jumysy «Jańa fýnksıo­nal­dyq materıaldar jáne tehnolo­gııa­lar», «Qazaqstan Eýrazııanyń áleý­mettik-saıası jáne tarıhı-mádenı keńis­tiginde», «Marketıng pen logıstıkadaǵy Digital-tehnologııalar: «XXI ǵasyrdaǵy agroónerkásip ke­sheni: ǵylym jáne ın­no­vasııalar», «Júıelik medısına – medısınanyń, densaýlyq saqtaý­dyń jáne áleýmettik qamtamasyz etý­diń mýltıplıkatıvtik damýy» seksııa­laryna bólingen.

Sondaı-aq plenarlyq otyrys, dóń­gelek ústelder, trenıng-áńgimelesý, forsaıt-alańdar, netvorkıng-sessııalar, «Meniń tabys tarıhym» ýájdemelik kezdesýler, ınteraktıvtik semınarlar, ǵylym jáne bilimniń ártúrli ba­ǵyt­tarynyń bazalyq trendterin nasıhattaý boıynsha trenıngter ótedi.

Forýmnyń jumysyna Konstıtý­sııa­lyq Keńes tóraǵasy Qaırat Mámı, Bilim jáne ǵylym mınıstri Ashat Aıma­ǵam­betov, Indýstrııa jáne ınfraqury­lym­dyq damý mınıstri Roman Sklıar, Densaýlyq saqtaý mınıstri Eljan Bir­tanov, Aýyl sharýashylyǵy mınıstri Saparhan Omarov, Ádilet mınıstri Marat Beketaev, Memlekettik qyzmet isteri jónindegi agenttiginiń tóraıymy Anar Jaıylǵanova qatysady dep kútilýde.

Forým jumysy 9 tamyzda aıaqtalyp, rezolıýsııa qabyldanady.

Aqmola oblysy,

Býrabaı aýdany