О́ńirlik kásipkerler palatasy bir kásipkerdiń jer telimin ózinde qalýyna kómektesse, ekinshi iskerdiń 12 mln teńgege jýyq qarajatyn qaıtarýǵa kúshin saldy.
Mańǵystaý oblysynyń kásipkerler palatasy jeke kásipker Sh.Smaılova Mańǵystaý oblysynyń jerdi paıdalanylýy men qorǵalýyn baqylaý basqarmasynyń jer telimin memleket menshigine keri qaıtarý týraly talabyna baılanysty kásipkerler palatasynan kómek suraǵan bolatyn.
Naqty aıtqanda, jeke kásipker Sh.Smaılova Munaıly aýdany, Mańǵystaý aýylynda ornalasqan, kafe, shashtaraz jáne dúken qurylysyn salý úshin, kólemi 0,1250 gektar, jeke menshik quqyǵyndaǵy jer ýchaskesin, syıǵa tartý týraly kelisim-sharty negizinde alyp 2014 jyly ádilet organynda tirkegen.
2015 jyly atalǵan jer ýchaskesin ıgerý maqsatynda, tıisti mekemelerden ruqsat qaǵazdaryn alyp, jumys jobalaryn jasaqtatyp, saraptamalyq qorytyndyǵa ıe bolady. Odan ári turmystyq jaǵdaıyna baılanysty jer telimin ıgerýge múmkindigi bolmaǵan.
2018 jyly Mańǵystaý oblysynyń jerdiń paıdalanýy men qorǵalýyn baqylaý basqarmasynyń ókilderi kelip, Smaılovanyń jer telimi nysanaly maqsatyna saı paıdalanylmaýyna jáne ıgerilmeýine baılanysty zańdylyqtyń buzylýyn joıý týraly nusqama berip, jerdi ıgerý úshin bir jyl merzim ýaqyt belgileıdi.
Osy bir jyl ishinde kásipker jer telimin tolyq tastan qorshap, temir esikter ornatyp, nysannyń qurylysyn bastaý úshin jobalaýǵa arnalǵan sáýlet-josparlaý tapsyrmasyn qaıta alyp, nobaılyq jobasyn qaıta jasaqtatyp, oblystyq sáýlet-qurylys baqylaý basqarmasyna qurylysyn bastaý úshin barlyq ruqsat qaǵazdaryn rásimdegen.
- Soǵan qaramastan oblystyq jerdiń paıdalanýy men qorǵalýyn baqylaý basqarmasy 2019 jyly kásipkerdiń jerin tekserip, ony ıgermedi degen ýájben, májbúrlep memleket menshigine qaıtaryp alý týraly talap aryz bergen. Sóıtip Mańǵystaý oblysynyń mamandandyrylǵan aýdanaralyq ekonomıkalyq sotymen azamattyq is qozǵalǵan. Kásipkerler palatasynyń sarapshylary bul ispen tolyq tanysyp, qarsy pikir mátinin daıyndap, sot otyrysyna kásipkerdiń ýákili retinde qatysyp, dáleldemelik derekterdi usyndy, deıdi О́KP dırektorynyń orynbasary Ámirǵalı Janaev.
Mańǵystaý oblysynyń mamandandyrylǵan aýdanaralyq ekonomıkalyq soty májilis kezinde taraptardyń pikirin tyńdap, jınaqtalǵan dáleldemelik derekterge baǵa bere kele, sot sheshimimen talap aryzdy qanaǵattandyrýsyz qaldyrdy. Osylaısha daýly jer telimi kásipker paıdasyna sheshildi.
Mańǵystaýlyq kásipkerdiń 12 mln teńgege jýyq qarajaty óńirlik kásipkerler palatasynyń kómegimen tólendi. Jeke kásipker M. Boqaev Aqshuqyr mektep-lıseıine oqýshylardy tasymaldaǵan qyzmeti úshin aýyl ákiminiń qarajat aýdarmaı otyrǵanyn málimdep, kásipkerler palatasynan kómek surap kelgen edi.
Oqýshy tasymaly boıynsha Aqshuqyr aýyly ákimi apparaty men jeke kásipker arasynda shart jasaqtalyp, isker óz mindetin tolyq oryndaǵan. 14 adamdy jumyspen qamtyp, tıisti salyqtaryn da ýaqytyly tólegen.
Alaıda, aǵymdaǵy jyldyń sáýir-mamyr aılary úshin oryndalǵan jumystarǵa aýyl ákiminiń apparaty 11 725 000 teńge kóleminde qarajatty aýdarmaı otyrǵany anyqtaldy. Sonyń saldarynan kásipker jumysshylardyń jalaqysyn bere almaı, olar tarapynan da narazylyq týyndady.
Bul daýdy sotqa jetkizbeı, jan-jaqty qarap, oń sheshimin tabý maqsatynda, kásipkerler palatasynyń uıymdastyrýymen dóńgelek ústel ótti. Jıyn barysynda, aýdandyq ekonomıka jáne qarjy bóliminiń basshysy men Aqshuqyr aýyly ákimi apparatynyń ókili qaryzdy jaqyn arada aýdaratynyn málimdep, ýádelerin bergen bolatyn.
Qazir 12 mln tg jýyq qarajat tolyq kólemde aýdarylyp, kásipker aryzy tolyq qanaǵattandyryldy.
Máseleleri oń sheshilgen kásipkerlerdiń qýanyshynda shek joq.
- Birneshe aı boıy jergilikti atqarýshy organnan mańdaı ter, eńbek aqymyzdy ala almaı qınalyp júr edik. Qol astymyzdaǵy jumysshylar da jalaqysyna qol jetkize almaı narazy bolyp kelgen. MO «Atameken» kásipkerler palatasynyń qyzmetkerlerine alǵysymyz sheksiz. Sotqa sabylmaı-aq, daýly máseleni oń sheship berýge kóp kúsh jumsady. Kásipkerlerdiń quqyn qorǵaıtyn osyndaı mekemeniń bolǵany úlken qoldaý, deıdi kásipker M. Boqaev.
Mańǵystaý oblysy