Baiqonyr International Short Film Festival-ge qatysýǵa ótinim qabyldaý aıaqtaldy

Bıylǵy jyly ulttyq baıqaýǵa qatysýǵa 170-ten astam jumys kelip túsken. Biraq, 22 fılm ǵana Baiqonyr ISFF baǵdarlamasyna endi. Irikteýdi kınotanýshylar – Erjan Jumabekov, Bekjan Baıgenjeev jáne rejısser Oljas Isaev júrgizdi.

Ulttyq baıqaý «Kórkemsýretti kıno» jáne «Derekti kıno» seksııasynan quraldy. «О́kinishke qaraı, bıylǵy jyly anımasııalyq kıno seksııasy ótkizilmeıdi. О́ıtkeni baǵdarlamany quraýǵa ótinimder jetkilikti bolǵan joq. Meniń oıymsha, bul máselege nazar aýdarǵan jón. Sebebi, qysqametrli anımasııalyq fılmderdiń óndirisi qıyn jaǵdaıda. Baiqonyr ISFF kórsetkishi osyǵan dálel», - dedi festıvaldiń baǵdarlama dırektory Erjan Jumabekov.

«Derekti kıno» seksııasy boıynsha kórsetiletin fılmderdiń ishinde Aısha Sálimgereevanyń «Meraki», Kamılla Berdimuratovanyń «Taqsyr», Nadıra Sadýovanyń «Ostrov Krym»,  Rabıǵa Orynbasarovanyń «Hanskıe tansy», Nurqadir Úrimhannyń «Qarǵalar», Nuralı Shakırov jáne Araı Altaevanyń «Kardıohırýrg», Jadyra Jumakúlbaeva men Dıas Balmaǵanbettiń «Focus» fılmderi bar. Ideıasy jaǵynan ár alýan, bir-birine uqsamaıtyn túrli taqyrypty qamtyǵan «Kórkemsýretti kıno» seksııasyna usynylǵan fılmderdiń sany da bıylǵy jyly mol kórinedi, aıtalyq: Ámir Ámenovtiń «Jazdyń salqyn túni», Álisher Jádigerovtiń «Qaǵaz tikushaq», Ińkár Kárimniń «Tango», Talǵatbek Ábishevtiń «Jeltoe plate», Elaman Shaýbanovtyń «Baýyr»,  Mádı Baljanovtyń «Statýs ne svoboden», Azamat Sharǵynnyń «Maks»,  Samǵar Raqymnyń «Dıplommen – aýylǵa», Jarqyn Tleýhordyń «177», Nurmahan Teljan men Temirlan Erdaýletovtiń «Pokoı», Temirlan Arysbaevtyń «Izbasar», Nurbol Erbolulynyń «Masa», Myrza Baısambekovtiń «Ýdobrenıe», Armat Telmanovtyń «Aıyp» fılmderi festıval júldesinen úmitker.

Baiqonyr ISFF 2019 jyldyń 4-8 qyrkúıek aralyǵynda Kinoplexx Sary Arka kınoteatrynda ótedi. Bas seriktes - Kinoplexx Theaters. Seriktes - Visit Almaty jáne Almaty qalasynyń Týrızm basqarmasy. Festıval uıymdastyrýshysy – «Brodveı» kınoportaly.

ALMATY