Qostanaıda «Regıon-10» atty joǵalǵandardy izdeý resýrsy paıda boldy. www.region10.kz. saıtynda joǵalǵan adamdardy izdeý jóninde aqparattardy bilýge bolady, sondaı-aq ǵalamtorda jıi kezdesetin jalǵan aqparattardyń da ras-ótirigin ajyratýǵa osy saıttan kómek beredi.
Saıtty Iаna Malıar, Tatıana Mılehına jáne Irına Karpenko esimdi eriktiler jasady. Resýrsty qurý jáne ony toltyrý ıdeıasyn Qostanaı oblysynyń polısııa departamenti qoldap, birigip jumys isteýge kelisti. Qazir saıt óziniń resmı qyzmetin bastaǵan. Tártip saqshylarymen yntymaqtastyq qalaı qurylatyny jáne resýrstyń qalaı jumys isteıtindigi týraly volonterler oblystyq polısııa departamentinde ótken brıfıngte aıtyp berdi.
«Bizdiń izdeý jasaǵymyz 2018 jyldyń tamyz aıynda quryldy. Qazirde onyń quramyna 16 volonter jáne halyqaralyq kınologııalyq odaǵynyń 4 ıti bar. Sondaı-aq «K-9» Qostanaı kınologııalyq klýb quramynda bolady. Biz qazirdiń ózinde polısııa qyzmetkerleriniń barlyq izdeý operasııalaryna atsalystyq. Nátıje bar. Jyl basynan beri 10-nan astam joǵalǵan adamdy tabýǵa kómektestik» deıdi Tatıana Mılehına.
Aıta ketý kerek, eriktiler joǵalǵandardy izdeýmen rııasyz aınalysady. Olardyń barlyǵy turaqty jumys isteıdi, biraq adamdarǵa kómektesýdi óz paryzy sanaıdy.Olar «Qyzyl jarty Aı» jáne «GRIN» ÚEU-nyń qoldaýymen alǵashqy kómek kórsetý, izdestirýdi uıymdastyrý jáne joǵalǵan adamdardy izdeý kezinde qajetti bastapqy áreketterdi júrgizý jóninde arnaıy daıyndyqtan ótti.Saıt yńǵaıly navıgasııa jáne birneshe bólimderge ıe. Ol aqparattyń túsýine qaraı jańartylyp otyrady. Qazir saıtta joǵalyp ketken 7 adam men tabylǵan 5 adam týraly málimet bar. Qazirgi tańda polısııa qyzmetkerleri basqa da izdestirý faktileri boıynsha aqparat daıyndap jatyr.Volonterler balalardyń joǵalǵany týraly jalǵan aqparattarǵa erekshe nazar aýdarady.
«Eger mundaı habarda ata-analarmen qalaı baılanysýǵa bolatyn telefon nómirleri kórsetilmese, habar kóńil kúı erkimen aıtylsa, bul jalǵan ekenine senimdi bolyńyz. Bizge mundaı habarlamalardy tekserýge jıi habarlasady» deıdi Irına Karpenko.
Qostanaı