Sońǵy jyldarda nekeniń jıi buzylýy, bala taǵdyrynyń tálkekke aınalýy qoǵamdaǵy ózekti máseleniń birine aınaldy. Shańyraǵy shaıqalǵan ortalarda balalar quqyǵyn taptaý, otbasy qundylyqtaryn qurmettemeý syndy kereǵar ádetterdiń qoǵam sanasyna dendep bara jatqandyǵy alańdatady. Otbasy ǵana emes, bútindeı bir eldiń qasiretindeı kókeıkesti máselemen kúresip, onyń aldyn alý maqsatynda elimizdiń 8 aımaǵynda 11 ortalyq ashylyp, «Baqytty otbasy» pılotty jobasy júzege asa bastady. Otbasyn qoldaý resýrstyq ortalyǵynda psıholog mamandarmen qatar, zańger, áleýmettik qyzmetkerler tegin keńester berip, shańyraqtardyń shaıqalmaýyna yqpal etýde.
Osy oraıda úkimettik emes uıymdar tarapynan kámeletke tolmaǵan balalardyń múddesin qorǵaı otyryp, otbasy músheleriniń qarym-qatynasyn qarastyratyn biryńǵaı sot júıesin qurý usynylǵan. Almatydaǵy Qazaqstan baspasóz ortalyǵynda ótken basqosýda «Baqytty otbasy» pılottyq jobasynyń aralyq nátıjelerimen tanystyrǵan «Daǵdarys ortalyqtary odaǵy» birlestigi basqarma tóraıymy Zýlfııa Baısaqova Qazaqstanda ajyrasý, múlikti bólisý, turmystyq zorlyq-zombylyq máselelerin qarastyratyn jeke otbasylyq sotyn qurý máselesi týraly atap ótti. Onyń quramyna ıývınaldy, azamattyq jáne aýdanaralyq arnaıy ákimshilik soty kiretin bolady. Joba nátıjeli júzege asýy úshin Sıngapýr, Kanada, Germanıa sııaqty elderdiń tájirıbesi basshylyqqa alynǵan. Eger de otbasy óz máselesin beıbit jaǵdaıda sheshe almaı, ajyrasýǵa soqtyryp jatsa, onda bala tárbıesine ekijaqty aralasýǵa qolaıly jaǵdaılar jasaý múmkindikteri qarastyrylady. «Daǵdarys ortalyqtary odaǵy» birlestigi osy baǵytta birqatar sarapatamalar júrgizip, quqyqtyq aktiler ázirleýge de atsalysqan.
Zýlfııa Baısaqovanyń aıtýynsha, áleýmettik jaǵdaı men otbasylyq saıasattyń ara jigi ashylmaǵan. Búginde otbasylyq sottar qandaı da bir áleýmettik máselelerdi sheshýmen ǵana shektelip júr. Al otbasylyq ınstıtýt jeke nysan retinde qarastyrylmaıdy. Sonda otbasy qundylyǵynyń qaınaryn qaıdan izdeımiz? Tipten, memleket pen otbasy arasyndaǵy qarym-qatynas ta rettelmegen. «Pılottyq jobanyń nátıjeleri boıynsha jobany júzege asyrýshy retinde ajyrasýdy qysqartý, sondaı-aq kámeletke tolmaǵan balalardyń múddelerin qorǵaý maqsatynda Otbasy jáne neke týraly QR zańnamasyna ózgerister engizý úshin usynystardy qalyptastyrýymyz kerek. О́kinishke oraı, Qazaqstanda balalardyń jáne ata-ana men otbasy quqyqtaryn qorǵaý boıynsha naqty saıasat joq. Biraq búgin biz memlekettiń osy saladaǵy jaǵdaıdy ózgertý nıetin kórip otyrmyz. Otbasylyq sottar men otbasyn resýrstyq qoldaý ortalyqtarynyń tájirıbesine súıensek, elimizdegi adamdar dıalogqa, tatýlasýǵa daıyn ekendigin, psıhologtar men medıatorlarmen jumys isteýge qarsylyq bildirmeıtinin kórsetýde. Bizdiń mentalıtetimizde otbasylyq problemalar bolǵan jaǵdaıda psıhologqa, medıatorǵa barý keń taralmaǵan. Eger de memleket azamattarǵa osyndaı múmkindik berse, qoǵamda dıalog deńgeıi, áriptesin tyńdaı bilý jáne ymyraǵa kelý, quqyqtyq mádenıet, jaýapkershilik deńgeıi ósip, otbasylyq qarym-qatynasqa oń yqpal etken bolar edi» dep atap ótti Zýlfııa Baısaqova.
«Baqytty otbasy» jobasy otbasy saıasaty salasynyń sarapshysy Elvıra Vatlınanyń aıtýynsha, maýsym aıynan bergi aralyqta otbasyn resýrstyq qoldaý ortalyqtaryna 600-den astam adam ótinish bildirip, 250-ge jýyq jup tatýlasýǵa kelisimin bergen. О́tinish bildirýshilerdiń eń tómengi jasy – 21-de bolsa, úlkeni 62 jasta. Nekede 10 jyl turǵan – 345, 10-20 jyl aralyǵynda – 124, 20 jyldan joǵary 27 adam ótinish bergen. Osy kórsetkishterge qarap, ajyrasýǵa ótinish bergenderdiń ár túrli jastaǵy azamattar ekenin ańǵarýǵa bolady. Al Almaty qalasy boıynsha «Baqytty otbasy» otbasy sottary janyndaǵy resýrstyq ortalyq psıhology Gaýhar Onjanova otbasy múshelerin ymyraǵa shaqyrýdaǵy qıyndyqtar men olarǵa kásibı deńgeıde otbasylyq qundylyqtardy túsindirýdiń asa mańyzdy ekendigine toqtaldy. Mamandar keltirgen derekterge súıensek, Qazaqstan búginde ajyrasý jaǵynan álem elderi arasynda 10-shy orynda tur. Al aǵymdaǵy jyldyń alǵashqy jartyjyldyǵynda elimizde 63 917 neke tirkelse, ajyrasqandar kórsetkishi 29073-ke jetip, 45,5 paıyzdy quraǵan. Birlestik mamandary sonymen qatar elimiz aımaqtarynda ashylǵan Otbasyn resýrstyq qoldaý ortalyqtary aptasyna 5 kún, tańnan keshke deıin tegin keńes beretindiginen habardar etip, 150 nómiri arqyly shuǵyl qońyraý shalýǵa bolatyndyǵyn eskertti.
ALMATY