Prezıdent Joldaýynda tıimdi shaǵyn jáne orta bıznes qala men aýyldy damytýdyń negizi ekendigi aıtyldy. Ásirese, mıkrobıznes elimizdiń áleýmettik-ekonomıkalyq jáne saıası ómirinde mańyzdy ról atqarady. Onyń nátıjesinde turaqty jumys oryndary ashylyp, jumyssyzdyq azaıady.
Memleket basshysy alǵa qoıǵan mindetterdiń dáleli retinde Almaty qalasynyń ákimi Baqytjan Saǵyntaev kásipkerlerdiń dástúrli V konferensııasy barysynda qala qorjynyna túsetin salyqtyń alpys paıyzdan astamy shaǵyn jáne orta bızneske tıesili ekendigin jetkizip, óńirlik bıznesti damytýǵa arnalǵan «Almaty Business-2025» biryńǵaı baǵdarlamasynyń ázirlengendigin jetkizdi.
Ekonomıkalyq belsendi aımaq Almatyny damytý boıynsha qala basshylyǵy tarapynan qazirgi kezeńde osy baǵdarlama boıynsha bes baǵytta jumystar atqaryla bastady. Qazirgi kezde bes baǵyt boıynsha kedergilerdi joıý, bıznesti qarjylandyrýdy arttyrý, ınfraqurylymdy damytý jáne ınvestısııalyq jobalardy qoldaýǵa baılanysty keshendi sharalar júzege asýda. Al osy baǵytta «Qoldau» kásipkerlik ortalyǵynyń qalanyń alty aýdanynda bólimsheleri ashylyp, onda bir tereze qaǵıdaty boıynsha kásipkerlik keńester berilýde. Ońtústik astanada tirkelgen 180 myńnan astam kásiporyn ókilderi osy konferensııada ózderin tolǵandyrǵan úlkendi-kishili máselelerge oraı «Atameken» UKP men qala basshylyǵyna usynystaryn jetkizdi.
Kásipkerlikke qoldaý kórsetý men damytý — ákimdik jumysynyń strategııalyq basym baǵyttarynyń biri ekendigine toqtalǵan qala ákimi «Almaty Business-2025» biryńǵaı baǵdarlamasy Almatyny Orta Azııanyń bıznes-habyna aınaldyrý maqsatynda ári kásipkerlikti tikeleı qoldaý men damytýǵa negizdelgenin jetkizdi. Baqytjan Saǵyntaev sonymen qatar áleýmettik salaǵa da erekshe nazar aýdarylatynyn atap ótip, medısına, bilim, IT tehnologııa jáne týrzım salalaryndaǵy bızneske qoldaý saraptamaly-baǵdarly klaster qurýǵa múmkindik beretindigine toqtaldy. Aldaǵy ýaqytta qala basshylyǵy «Atameken» UKP birlesip «shıkizat-óndiris-ótkizý» tártibi negizinde jobalardy júzege asyra bastaıdy. Bul qalanyń bıznes-ahýalyn túbegeıli ózgertýge múmkindik beredi.
«Atameken» QR Ulttyq kásipkerler palatasynyń Tóralqa tóraǵasy Tımýr Qulybaev kásipkerlerdi qoldaý máselesinde «Atameken» ákimdikpen birlese jumys istep, problemalyq kredıtter qorynda jatqan jer telimderin áleýmettik-kásipkerlik korporasııa balansyna berý jóninde Úkimetke ótinim jasaýǵa daıyn ekendigin jetkizdi. Al bos jerlerdi qandaı qajettilikterge alýǵa bolatynyn anyqtaý úshin bas jospardyń derekterin negizge ala otyryp, sondaı-aq qalanyń áleýmettik damýyna qajetti jer telimderin belgilep, qalǵanyn bıznes qajettilik úshin aýksıonǵa shyǵarý máselesin, bankterde kepildikte jatqan jerlerdi qoldanýdyń quqyqtyq mehanızmderin jasaý qajettiligine toqtaldy. Búginde qalada jer telimderi boıynsha aqparatty sıfrlandyrý tolyq aıaqtalǵan.
Almatydaǵy iskerlik ahýaldy jaqsartý men ashyqtyǵyn qamtasyz etýde bos jer telimderi, ınjenerlik jelilerdiń qýaty jáne olarǵa qosylý múmkindigi týraly elektrondy aqparattar kásipkerge onlaın rejımde qoljetimdi bolýy qajet degen Tımýr Qulybaev turaqty emes saýda nysandarynyń máselesin de qozǵap ótti. Al ony sheshýdiń tetikterin Nur-Sultan qalasynda júzege asqan «1000 saýda orny» jobasynyń tájirıbesi negizinde qarastyrýdy usyndy.
Konferensııada qala ákiminiń orynbasary Saparbek Tuıaqbaev «Almaty Business-2025» aımaqtyq baǵdarlamasyn tanystyrdy. Qalada, sondaı-aq qala mańynda ornalasqan barlyq kásipkerlik nysandardy qoldaýǵa baǵyttalǵan keshendi baǵdarlama aıasynda «Qoldau» ortalyǵy jáne jas kásipkerlerge arnalǵan «Bastau» jobasynyń qolǵa alynǵandyǵyn jetkizdi. Sonymen qatar Saparbek Tuıaqbaev «bir tereze» negizinde jumys isteıtin «Qoldau» ortalyǵynda bızneske qatysty barlyq uıymdardyń jáne de jer ýchaskelerin tirkeý mekemeleriniń de ornalasatyndyǵyna toqtaldy. «Al jas kásipkerlerge arnalǵan «Bastau» baǵdarlamasy «Atameken» kásipkerler palatasy arqyly júzege asady. Elý shaqty keńsede tájirıbeli kásipkerler bızneske kelgen jastarǵa dáris oqıtyn bolady. Baǵdarlama aıasynda qysqa merzimdi oqytýǵa búginde 4 myńnan asa adam jiberilgen. Al «Almaty Business-2025» aımaqtyq baǵdarlamasy aıasynda aǵymdaǵy jyly 9 myńnan astam maman oqytylsa, 2020 jylǵa qaraı 30 myńnan jumys ornyn ashý kózdelip otyr.
ALMATY