Memleket basshysy Qasym-Jomart Toqaevtyń kóp kózin tikken alǵashqy Joldaýynyń basty ereksheligi, osyǵan deıin alǵan bıikterimizdiń, qol jetkizgen ıgilikterimizdiń Elbasy Nursultan Nazarbaev basqarǵan dáýirmen baılanysty bolǵanyn dáıektep aıta otyryp, óziniń Saılaýaldy tuǵyrnamasynda júıelep, saıası baǵdarlamasynda aıqyn kórsetken, halyqqa bergen ýádesin nyq senimmen júzege asyrýǵa baǵyt alǵanyn baıqatty.
«Syndarly qoǵamdyq dıalog – Qazaqstannyń turaqtylyǵy men órkendeýiniń negizi» degen irgeli taqyryp túıin-túıin bolyp turǵan syzdaýyq-syrqattyń soqtasyn ústinen saýsaqpen dáldep turyp basqandaı, alańdaıtyn ahýalǵa kelgen qoǵamnyń keıbir máselesine moıyn burǵyzyp, nazar aýdartty. Jyl saıynǵy Joldaýda buryn san ret aıtylǵan, jalpy jurtqa tanys jaıttardy taǵy bir márte tizbelep shyǵý shart emes, bastan-aıaq zer salyp qaraǵan adamǵa, ózektiligimen, zárýligimen qoǵamnyń aldyńǵy qatardaǵy kúıip turǵan máselesine aınalǵan halyq kókeıindegi keıbir talap-tilektiń Prezıdenttiń tuńǵysh Joldaýynda ýaqtyly ári oryndy atalýy jańa úmittiń otyn jaqqandaı boldy. Demek, bul Úkimettiń de, Úkimet quramyndaǵy túrli atqarýshy bılik oryndarynyń jaýapkershiligin de arttyrýǵa baǵyttalady degen sóz. Joldaý, bir jaǵy, Prezıdenttiń qadap turyp kórsetken qadaý-qadaý tapsyrmalaryn qadaǵalaýdy kúsheıtý jónindegi óz aldyna jeke-dara qurylym sekildi kórinedi.
Ustazdyń bedelin kóterý – ulttyq tanymnyń, rýhanı keńistiktiń bedelin qalyptastyrý degenge saıady. Prezıdent ustazdardyń Tamyz konferensııasynda sóılegen sózin taǵy bir pysyqtap, muǵalim mártebesin kóterý oǵan degen qurmetti oıatýmen birge ornyǵatynyn oryndy atap ótti. Sondaı-aq shaǵyn jáne orta kásipkerlikpen aınalysatyn isker azamattardy úsh jylǵa deıin salyqtan bosatý da ekonomıkany dál búgin damytyp jibermegenimen, túbi órkendeýge jol ashatyn, kásipkerdiń ózine degen senimin bekitip, ony qorǵaýǵa baǵyttalǵan memlekettik qoldaý dep bilemin. Ekonomıkalyq turǵyda jańǵyrý naryqtaǵy damýmen ǵana baılanysty emes, ol áleýmettik, rýhanı órkendeýmen ózara tyǵyz baılanysty damyǵanda ǵana oń nátıjesin kórsetetinin dáleldep qoıǵan.
Halyqty alańdatyp otyrǵan saıası, áleýmettik máselelerdiń úlkeni – jer. Prezıdent «Jer birde-bir sheteldikke satylmaıdy!» degen sózdi naqtylap turyp aıtty. Osy Joldaýdan keıin «buǵan qosymsha qos palataly Parlament «Jer týraly» Zańǵa ózgerister men tolyqtyrýlar engizse de artyq bolmaıdy eken» degen oıdyń kelgenin de jasyryp qaıteıik.
Bala – bolashaǵamyz. Bolashaǵymyzdy búgin qorǵamasaq, erteń kesh bolady. Olardyń árqaısysy memleketimizdiń qymbat qazynasy. Biraq salǵyrttyqtan, jazadan ońaı qutylyp ketip jatqan qylmyskerlerdiń zań normalaryn aıaqasty etýinen balalarǵa jasalatyn ozbyrlyq pen qysym toqtamaı tur. Jaratylysy názik, qorǵansyz búldirshinderge qatysty zorlyq-zombylyq kórsetý máselesi tereńdigi men kólemi jaǵynan barlyq shekti mólsherden, dabyl qaǵatyn deńgeıden asyp, olardyń quqyǵynyń zańmen qorǵalýyn, qylmyskerlerdiń qatań jazalanýyn qoǵam tutas qoldap otyr. Qaýip-qaterge toly, kóptiń ashý-yzasyna tıetin bul másele qansha jyldan beri talqyǵa túsip keledi, sebebi men saldary zerttelip te jatyr, jaza da taǵaıyndaldy. Biraq nátıje az. Sondyqtan qoǵamnyń senimi men halyqtyń ózin qaýipsiz sezinýi úshin Joldaýda aıtylǵan balalardy qorǵaý máselesiniń oń sheshimin tabatyn ýaqyty keldi.
Elbasynyń tarıhı qujattaryndaǵy osyǵan deıin kórsetilgen, oıdaǵydaı oryndaýyn tapqan, áli de kemeldendirýdi kerek etetin strategııalyq qadamdary, qoǵamdy jańǵyrtý, jetildirý jónindegi oılarynyń bári jańa Joldaýda zańdy jalǵasyn taýyp otyr. Jańǵyrýǵa baılanysty jańa talaptar belgilengen, ashyqtyq pen naqtylyqty kózdegen azamattyq qoǵam deńgeıine kóterilýdiń birqatar alǵysharttary keńinen qamtylǵan Joldaý kópke senim uıalata alýymen mańyzdy.
Nurlan ORAZALIN, aqyn, Memlekettik syılyqtyń laýreaty