«Rýhanı jańǵyrý» baǵdarlamasy aıasynda zaǵıp ánshiler arasynda respýblıkalyq konkýrs bastaldy.
Baıqaý Almaty mańyndaǵy «Spýtnık» demalys ornynda Qazaq soqyrlar qoǵamynyń qarjylaı ári Zaǵıp jáne nashar kóretin azamattarǵa arnalǵan respýblıkalyq kitaphanasynyń qoldaýymen Sadyq Kárimbaevtyń týǵanyna 100, Jaqsygeldi Seıilovtyń týǵanyna 70 jyl tolýyna oraı ótkizilip otyr.
Osy oraıda shyǵarmashyl tulǵalardyń ómirine qatysty qysqasha málimetti usyna ketpekpiz: Sadyq Kárimbaev (1918-1975) – kompozıtor, mýzykant-ánshi, aqyn-jyraýlar ómirin zertteýshi, Qazaq SSR-niń eńbek sińirgen ártisi (1974). Zaǵıptyǵyna qaramastan, ol Birjan-sal, Aqan-Seri, Jaıaý Musa, Maıra, Estaı sııaqty aqyn-jyraýlardyń shyǵarmashylyǵyn zerttep, jurtshylyqqa nasıhattaǵan. S. Kárimbaevtyń shyǵarmalaryn Qazaqstannyń halyq ártisteri – R. Baǵlanova, B. Tólegenova, J. Elebekov, R. Qoıshybaeva jáne basqa da ártister ózderiniń repertýaryna engizip, oryndaǵan.
Jaqsykeldi Seıilov (1949-1997 jyly), zaǵıp ánshi-kompozıtor, Qazaqstan Respýblıkasynyń eńbek sińirgen mádenıet qyzmetkeri (1990). Áıgili «Dos-Muqasan», «Gúlder» ansamblderiniń izimen «Qaraqóz» vokal-aspapty ansambli dúnıege keledi. Onyń negizin qalaýshy ári jetekshisi Jaqsygeldi Seıilov boldy. Onyń «Nege solaı?», «Aınalaıyn qanatym», «Jezkıik», «Kezdesý» jáne basqa da ánderi kúni búginge deıin án súıer qaýymnyń júregin jaýlap keledi.
Baıqaýǵa qatysýshylar men Qazaq soqyrlar qoǵamynyń ardagerleri demalys úıine respýblıkamyzdan barlyq qalalarynan jınalyp, jerebe tastaý rásimine qatysty.
Búginde Qazaq soqyr qoǵamy qoǵam músheleri arasynda sport, án óneri, poezııa jáne t.b. boıynsha turaqty túrde respýblıkalyq, halyqaralyq saıystardy ótkizýdi qaıta jandandyryp keledi. Osyǵan oraı sońǵy eki-úsh jyldan bergi aralyqta Almat Naýryzbaev basshylyǵymen Qazaq soqyrlar qoǵamy tarapynan mádenı, ońaltý, sport sharalary jıi ótkiziletin boldy. О́tken jyly qoǵam músheleri poezııa jankúıerleriniń respýblıkalyq saıysyn ótkizse, bıylǵy baıqaý úlken ıgi sharanyń jalǵasyndaı.
Baıqaýǵa qatysýshylar talap boıynsha eki án, ıaǵnı bir án atalǵan kompozıtorlardyń shyǵarmalarynan, ekinshi án óz qalaýlary boıynsha oryndalady. Jeńimpazdar aqshalaı syılyqpen marapattalady. Baıqaýǵa qatysýdyń shyǵyndary Qazaq soqyrlar qoǵamy tarapynan jabylady.