Jańa saılanǵan Memleket basshysynyń nemese Úkimet qyzmetiniń alǵashqy 100 kúnin qorytyndylaý kóptegen Batys elderinde, ásirese AQSh-ta keń taralǵan tájirıbe.
Atap aıtqanda, mundaı sholýlar HH ǵasyrdyń 30-jyldary F.Rýzvelttiń prezıdenttik kezinde AQSh «Uly daǵdarysty» bastan keshirgen ýaqytta qalyptasty. Rýzvelt Aq úıge kelisimen daǵdarysqa qarsy birqatar shuǵyl sharalarǵa muryndyq bolyp, 100 kúnniń ishinde 15 zańnamalyq akt qabyldaǵan bolatyn. Daǵdarysqa qarsy baǵyttalǵan bul sharalar áıgili «Jańa baǵyt» baǵdarlamasynyń negizin qalap, keıingi jyldary F.Rýzvelttiń amerıkalyqtar arasyndaǵy joǵary abyroıy men bedeliniń basty sebebine aınaldy. Mine, osydan keıin prezıdenttiktiń alǵashqy 100 kúndigi jańa saılanǵan ákimshiliktiń tıimdiligin tarazylaıtyn tetigi retinde qarastyrylady.
Eger osy turǵydan qarasaq, onda Qazaqstannyń jańa Prezıdenti qoǵamdaǵy júıeli máselelerdi sheshýde birqatar tıimdi ári batyl qadamdar jasap úlgergenin aıtýymyzǵa bolady.
Birinshiden, qyzmetine kirisken alǵashqy sátterinen-aq jańa Prezıdent bılik pen qoǵam arasyndaǵy tikeleı baılanys qurý qajettiligin anyq baıqatty.
Memleket basshysy laýazymyndaǵy birinshi kúnderinen bastap Qasym-Jomart Toqaev azamattyq qoǵammen tikeleı dıalog ornatýǵa nıetti ekenin jalpaq jurtqa jarııa etti. Osy rette Q.Toqaevtyń alǵashqy irgeli bastamalarynyń biri retinde Ulttyq qoǵamdyq senim keńesin qurý týraly usynysyn erekshe atap ótken jón. Bul bastama memleket damýynyń eń ózekti máseleleri boıynsha qoǵammen tikeleı suhbat ornatý úshin asa mańyzdy.
Ekinshiden, Arys qalasyndaǵy tótenshe oqıǵa kezinde Q.Toqaev ákimshiliginiń tıimdi áreketterin atap ótkenimiz jón. Bıliktiń shuǵyl ári tıimdi qadamdary men barsha otandastarymyzdyń belsendi atsalysýy arqasynda qysqa merzim ishinde qalany qalpyna keltirý jumystary sátti aıaqtalǵan bolatyn.
Budan bólek, jańa Prezıdenttiń alǵashqy qadamdaryn baǵalaǵan kezde, saıası bılik tranzıtiniń qalypty ótýiniń mańyzdylyǵyn eskergenimiz jón. Bıliktiń zańdy jáne órkenıetti jolmen aýysýy – búkil saıası júıe turaqtylyǵynyń basty kórsetkishteriniń biri ekenin umytpaýymyz qajet. Ásirese Qazaqstan sııaqty jas memleket úshin ózektiligi joǵary másele. Osy turǵyda Qazaqstannyń bolashaǵy úshin Elbasynyń strategııalyq baǵytynyń sabaqtastyǵyn saqtap, turaqtylyǵyn qamtamasyz etý óte mańyzdy.
Munyń aıqyn úlgisi retinde Prezıdenttiń Qazaqstan halqyna Joldaýyn atap ótýge bolady. Joldaýdaǵy basymdyqtar Elbasy N.Nazarbaevtyń memlekettik baǵytymen bite qaınasqan. Bular – tıimdi ári ashyq úkimetti qalyptastyrý, ShOB-ty qoldaý jáne shıkizattyq emes eksportty yntalandyrý, agroónerkásip keshenin, áleýmettik salany jáne aımaqtardy damytý jáne t.b.
Taǵy bir mańyzdy kórsetkish – syrtqy saıasattaǵy sabaqtastyqty saqtaý. Ol Qazaqstannyń halyqaralyq abyroıy úshin úlken mańyzǵa ıe. Eger Q.Toqaevtyń alǵashqy syrtqy saıası qadamdaryna kóz jiberetin bolsaq, olardyń táýelsizdik jyldarynda qalyptasqan kópvektorly syrtqy saıasatynyń negizgi basymdyqtarymen tyǵyz baılanysta ekenin kórýge bolady.
Erjan SALTYBAEV,
Qazaqstannyń Tuńǵysh Prezıdenti – Elbasy Qory janyndaǵy Álemdik ekonomıka jáne saıasat ınstıtýtynyń dırektory