Baýyrlas eldiń órenderi bas qosty

Elimizdegi Jastar jyly aıasynda ótken forýmdy Qazaqstan ózbekteri etno­mádenı birlestikteri «Dostyq» qa­ýym­dastyǵy men Shymkent qalalyq Qa­zaq­stan halqy Assambleıasy uıym­das­tyrdy. Jıynǵa Qazaqstan halqy Assambleıasy Tóraǵasynyń orynbasary Sherzod Pýlatov, О́zbekstannyń Qazaqstandaǵy Tótenshe jáne ókiletti el­shisi Saıdıkram Nııazhodjaev qa­tys­ty.

Forýmda eki el jastary arasyn­da­ǵy dostyqty nyǵaıtý máseleleri qaralyp, jastardyń 10-nan astam ınnovasııalyq jobasy men jetistikteri tanystyryldy.

«Qazaqstannyń О́zbekstandaǵy jyly jáne Qazaqstandaǵy Jastar jylyn sabaqtastyra uıymdastyrylǵan fo­rým eki eldiń jastary arasyndaǵy ózara túsinistikke yqpal eteri sózsiz. Úz­dik jobalardy tanystyrýǵa baǵyt­tal­ǵan is-sharalar bir-birlerimen tájirıbe almasýǵa zor múmkindik bere­di. Bıyl Qazaqstandaǵy Jastar jyly aıasynda jańa baǵdarlamalyq qu­jattar men jobalar sátti iske asyrylýda. Igi basta­ma­larǵa eldegi birlik pen berekeniń uıyt­qysyna aınalǵan Qazaqstan halqy Assam­bleıasy da eleý­li úles qosyp keledi, – dedi jıyn­da sóz sóılegen Qazaqstan halqy Assam­bleıa­sy Tóraǵasynyń orynbasary Sh.Pýlatov.

Al eki el arasyndaǵy san ǵasyr­lyq dostyǵymyz ben ynty­maq­tas­ty­ǵymyzdyń odan ári bekı túskenin aıtqan О́zbekstan elshisi Saıdıkram Nııazhodjaev jastar arasynda osyndaı basqosýlardyń jıi uıymdastyryla bastaǵanyna qýanatynyn jetkizdi.

Forým sońynda Shymkent qalalyq QHA tóraǵasynyń orynbasary Mu­rat­áli Qalmuratov pen Qazaqstan ózbek­teri etnomádenı birlestikteri «Dos­tyq» qaýym­das­tynyń tóraǵasy Ikram Hashım­janov belsendi jastarǵa erekshe qurmet kórsetip, sertıfıkattar men syılyqtar tabystady.

ShYMKENT