«Qazaqstan» Ulttyq telearnasy túsirgen detektıv janryndaǵy alǵashqy telehıkaıa kórermenge jol tartty. Jumys kúnderi «Qashqyn» ataýymen efırge shyǵatyn týyndy qoǵamnyń ózekti máselesine aınalyp otyrǵan jemqorlyq, teris dinı aǵymdardyń áseri, dástúrdiń qunsyzdanýy, otbasy qundylyqtary sııaqty san túrli taqyryptardy arqaý etedi.
Sonymen qatar telehıkaıa búgingi zamandaǵy quqyq qorǵaý ókilderiniń asa qaýipti qylmyskerlerdiń jolyn kesýdegi kásibı jumysy men qoǵam aldyndaǵy aýyr mindetin ashyp kórsetedi.
«Jemqorlyq pen ashkózdik jaılaǵan qoǵamda senim, birlik, baýyrmaldyq joǵalady. Jańa týyndy bıik adamgershilik qasıet pen adal eńbek joly ǵana qoǵamdy jaqsylyqqa jeteleıtinin, adamı órkenıettiń negizi taza jolmen qyzmet etý ekenin ashyp kórsetýdi maqsat tutady. Telehıkaıa ońaı jerden olja izdegen jannyń qaıshylyqqa toly, jaǵymsyz ómirin beıneleý arqyly ózgelerge oı salýdy kózdeıdi. Týyndynyń negizgi ıdeıasy – aınalasyna zııanyn tıgizetin adamnyń ómiri tyǵyryqqa tireletinin, zań ádildiginiń qaı kezde de ústemdik quratynyn kórsetý», deıdi «Qazaqstan» UTA Efırlik saıasat dıreksııasynyń dırektory Baǵjan Bımuratova.
Basty rólderdi Qazaqstannyń halyq ártisi Tilektes Meıramov, Qazaqstannyń eńbek sińirgen qaıratkeri Baýyrjan Qaptaǵaı syndy elimizge belgili tanymal akterlar somdaıdy. Telehıkaıa «Qazaqstan» Ulttyq telearnasynan aptanyń jumys kúnderi 21:30-da kórsetiledi.
«Egemen-aqparat»