Qala kúnine arnalǵan sharalar áli jalǵasyp jatyr. Alataý aýdany shahar turǵyndary men qonaqtaryna merekelik syı jasady. Qymyz jáne baýyrsaq festıvaline kelgender ulttyq taǵamdardan dám tatyp, onyń jasalý joldarymen tanysty. Bul aqparatty Almaty qalasy ákimdiginiń baspasóz bólimi habarlady.
Qalanyń qarbalasynan qoldary bosamaıtyn jurttyń nazaryna 10-ǵa jýyq qymyz ben baýyrsaqtyń túrleri usynyldy. Sondaı-aq mereke barysynda qolóner sheberleriniń de kórmesi uıymdastyryldy.
«Muny basty baýyrsaq deımiz. Ol ashyǵan qamyrdan pisiriledi. Qonaqqa syı-qurmet retinde usynamyz. Al mynaý – aq baýyrsaq. Buryn tórelerdiń dastarhanyna aq baýyrsaq salady eken», deıdi Almaty qalasy Alataý aýdany ardagerler uıymynyń múshesi Nesiphan Batyrhanova.