Shirkin, balalyq shaqtyń bal kúnderin ótkizgen ólkeden ystyq meken bar ma deseńizshi jer betinde. Bir-birine egiz qozydaı uqsas bel-belesterden asyp ótip, týǵan aýylyńa jaqyndaǵan saıyn kóńilińdi terbetken saǵynysh lebi kózińe jas bolyp irkiledi.
Osy joly, nege ekenin qaıdam, nazaryma alǵash ilikken nárse – alasa dóńniń ústindegi qyzyl shatyrly úıdiń qorasynda turǵan kók «Volga» boldy. «Oı, páli-aı, sen áli bar ekensiń-aý!» degendeı bir tańdanys keýdemde lap etip tutanyp, ótken kúnderdiń kóleńkesinde qalǵan eski sýretterge jaryq túsirgendeı tań-tamasha áserge bólendim.
...Biz ony Súıekeńniń kók «Volgasy» deıtinbiz. Ol kezde mundaı kólik asa baǵaly, kez kelgen adamnyń qoly jete bermeıtin qymbat dúnıe bolatyn. Sondyqtan da Súıekeńniń kók «Volgasy» bizdiń aýyldyń mártebesin basqa aýyldardan áldeqaıda bıiktetip, abyroıyn asqaqtatyp turatyndaı kórinýshi edi.
Al Súıekeń bolsa, aqkóńil, ázilqoı, jomart kisi-tuǵyn. Aýyldaǵy aýmaǵy at shaptyrymdaı qyrmannyń bastyǵy edi. Alǵashqy jyldary ol kók «Volgany» qyrmannyń kireberisindegi kúzet «býdkasynyń» janyna qoıyp ketip júrdi. Kele-kele ishke kirgizip qoıatyn boldy. Sóıte-sóıte, kúnderdiń bir kúninde at shaptyrymdaı qyrmandy kók «Volgamen» aralaıtyn kúnge de jetti. О́ıtkeni, Súıekeńniń salmaǵy jyldan-jylǵa artyp, júris-turysy aýyrlaı tústi...
Alda-jalda bóten aýyldan kele qalǵan bireý-mireýler basyn shaıqap, ishegin tartyp: «Úıbaı-aý, mynandaı myrza máshıneni burqyraǵan shań-tozańnyń ishine qalaı minip júrsiz?!» deı qalsa, Súıekeńniń jaýaby daıyn.
Álgi kisige qarap, myrs etip kúlip: «Áı, otyz tıynǵa alǵan máshıne ǵoı!» dep qolyn bir-aq silteıdi.
Onysy endi, yp-yras. Kók «Volgany» Súıekeń sol kezdegi otyz tıyndyq lotoreıa bıletine utyp alǵan bolatyn.
Keıde oılaımyn, mynaý dúnıedegi Alla taǵala jaratqan adamdardyń ǵana emes, zaýyttan shyǵatyn mashınalardyń da árqaısysynyń óz peshenesine jazylǵan taǵdyry bolsa kerek.
Árıne, mundaı pálsapalyq turǵydan qaraǵanda, bizdiń aýyl úshin dúnıe júzindegi eń baqytty da abyroıly mashına – Súıekeńniń kók «Volgasy». Al qaladaǵy árli-berli júıtkip júrgen áriptesteriniń kózimen qaraǵanda, eń baqytsyz, joly bolmaǵan mashına da osy...
Áıtkenmen, kók «Volganyń» da kúni ońynan týyp, mańdaıy jarqyrap, shań-tozańnan tazaryp qalatyn kezderi bolýshy edi. Sebebi aýyldaǵy jurt anda-sanda bolsa da aýdan, oblys ortalyǵynda turatyn, eń bastysy, ózderine syn kózimen qaraıtyn quda-jegjattaryna abyroımen baryp qaıtý úshin Súıekeńe qolqa salady. Sóıtip Súıekeńniń kelisimin alǵan kúnnen bastap kók «Volganyń» shańyn qaǵyp-silkip, jýyp-shaıyp jolǵa daıyndala bastaıdy...
Endi mine, sol kók «Volganyń» tot basyp, irip-shirigen qańqasy aýyldaǵy qoranyń bir buryshynda qalqaıyp tur. Pysyq kelinderdiń bireýi onyń ústine tezek jaıyp, keptirip qoıypty.
«E-eh, qaıran kók «Volga», deımin men oǵan qarap turyp. – Seniń de zamanyń ótken eken-aý!..»
Kenet meniń osy sózimdi kútip turǵandaı-aq, onyń ústindegi tezekterdiń biri top etip jerge qulap túskeni. Sol sátte maǵan kók «Volga»: «Al seniń she?..» dep, bir móńkip qalǵandaı bolyp kórindi...