Búgin Beıbit Atamqulov birinshi respýblıkalyq ekologııalyq saǵat aıasynda Nur-Sultan qalasyndaǵy №75 mektep-gımnazııasyna bardy. Onda bıologııa páninen aǵylshyn tilinde ótken «Qorshaǵan ortanyń lastanýy» atty ashyq sabaqqa qatysty. Bul týraly Indýstrııa jáne ınfraqurylymdyq damý mınıstrliginiń baspasóz qyzmeti habarlady.
- «Tabıǵatty qorǵaý – shekaralarmen shektelmeıtin is-shara. Búgingi ekologııalyq saǵat árqaısymyzdyń qorshaǵan ortanyń jaı-kúıi úshin óziniń jeke jaýapkershiligi týraly oılanýǵa, kún saıyn tabıǵat baılyqtaryn saqtaý úshin eńbek etip júrgenderdiń, sondaı-aq óz bastamasy boıynsha mańyzdy jáne qajetti isterdi jasaǵandardyń eńbegin eske alýǵa sebep bolatynyna senimdimin. Sizder de qorshaǵan ortaǵa, ortaq úıge uqypty qaraý prosesine belsendi qatysatyndaryńyzǵa senimdimin, biz úshin «Tabıǵatty qorǵaý - Otanymyzdy qorǵaý», - dep atap ótti óz sózinde vedomstvo basshysy.
Mınıstr sondaı-aq osy baǵytta makýlatýra jınaýdyń mańyzdylyǵyn atap ótti. О́ıtkeni, 1 tonna makýlatýra 10 aǵashty kesýden qutqarady.
- Mysaly, bizde Mınıstrlikte 2016 jyldyń sońyna qaraı bólek qoqys jınaý engizildi. Qaǵaz qaldyqtary jeke jınalady jáne makýlatýra retinde shyǵarylady, 3 jyl ishinde shamamen 30 tonna makýlatýra jınaldy, qoqysty (QTQ) shyǵarý 2 esege qysqardy. Tek bizdiń kúsh-jigerimizdi biriktire otyryp, biz bolashaq urpaq úshin Qazaqstannyń jáne búkil álemniń tabıǵı baılyqtaryn saqtaı alamyz! - dedi Beıbit Atamqulov.
Mekteptiń ınnovasııalyq blogy boıynsha ekskýrsııadan keıin mınıstr aǵash otyrǵyzýǵa qatysty.