Senattyń Konstıtýsııalyq zańnama, sot júıesi jáne quqyq qorǵaý organdary komıtetinde «Qazaqstan Respýblıkasynyń keıbir zańnamalyq aktilerine memlekettik qyzmet jáne sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy ekinshi oqylymda qaraldy. Bul týraly Parlament Senatynyń baspasóz qyzmeti habarlady.
Qazaqstan Respýblıkasy Parlamentiniń bir top depýtattary ázirlegen zań jobasynyń maqsaty kadrlardy konkýrstyq irikteýdi júrgizý jáne memlekettik qyzmetti ótkerý, sybaılas jemqorlyqqa qarsy is-qımyl júıesindegi sharalardy iske asyrý kezindegi quqyqtyq olqylyqtardy, kollızııalardy joıý arqyly memlekettik qyzmet máseleleri boıynsha zańnamany jetildirý bolyp tabylady.
Memlekettik qyzmetti ótkerýdi jańǵyrtý úshin zań jobasynda konkýrstyq rásimder ońaılatylady, ozyq sheteldik joǵary oqý oryndarynda doktorantýra baǵdarlamalary boıynsha oqyǵan, sondaı-aq halyqaralyq uıymdardaǵy jumys tájirıbesi bar adamdardy konkýrstan tys taǵaıyndaý kózdeledi, memlekettik qyzmetshilerdi áleýmettik qorǵaý jónindegi sharalar naqtylanady.
Memlekettik qyzmet isteri jónindegi ýákiletti organnyń quqyq qorǵaý organdary laýazymdaryna qoıylatyn biryńǵaı biliktilik talaptaryn bekitý jónindegi jáne memlekettik ákimshilik laýazymdarǵa ornalasýǵa kandıdattardyń jáne quqyq qorǵaý qyzmetine kiretin azamattardyń testileý nátıjelerine shaǵym jasaý tártibin aıqyndaý jónindegi qyzmeti retteledi.
Memlekettik qyzmetti ótkerý kezinde kásibı áleýetin anaǵurlym tıimdi paıdalanýdy qamtamasyz etý úshin saıası jáne memlekettik qyzmetshilerdi rotasııalaý tetigi naqtylanǵan. Normatıvtik quqyqtyq aktilerdiń jobalaryna sybaılas jemqorlyqqa qarsy ǵylymı saraptama jasaý ınstıtýty qalpyna keltiriledi.
Ulttyq ál-aýqat qory tobyna kiretin uıymdarda basqarý fýnksııalaryn atqaratyn adamdardyń Ulttyq ál-aýqat qorynyń tobyna kiretin basqarý organdaryndaǵy, baqylaý keńesterindegi, atqarýshy organdardaǵy, ózge de uıymdardaǵy aqy tólenetin laýazymdarǵa ornalasý quqyǵyn retteıtin ereje alyp tastalady.
Zań jobasyn talqylaý barysynda Senattyń turaqty komıtetteri men depýtattarynyń eskertpeleri men usynystaryn eskere otyryp, Májilis maquldaǵan zań jobasyna ózgerister men tolyqtyrýlar engizý qajettigi týyndady.
Qoldanystaǵy tártipti saqtaý maqsatynda oblystardyń, respýblıkalyq mańyzy bar qalalardyń jáne astananyń jergilikti atqarýshy organdaryna densaýlyq saqtaýdyń, bilim berýdiń, mádenıet pen sporttyń oblystyq basqarmalarynyń basshylaryn taǵaıyndaý, sondaı-aq olardy bosatý kezinde kandıdatýralardy tıisti ýákiletti memlekettik organdarmen kelisý usynylyp otyr.
Oblystardyń (respýblıkalyq mańyzy bar qalalardyń, astananyń) polısııa departamentteriniń bastyqtaryn Quqyq qorǵaý organdary basshylyǵynyń prezıdenttik rezervinde turǵan polısııa qyzmetkerleriniń qatarynan tıisti jergilikti atqarýshy organdarmen kelisý boıynsha Qazaqstan Respýblıkasynyń Ishki ister mınıstriniń taǵaıyndaýy kózdeledi.
Odan basqa, laýazymdar sanattary (saıası jáne ákimshilik memlekettik qyzmetshiler) boıynsha ózderine baǵynysty adamdardyń sybaılas jemqorlyq quqyq buzýshylyq jasaǵany úshin laýazymdy adamdardyń jaýapkershiligin naqtylaýǵa jáne reglamentteýge baǵyttalǵan túzetýler engiziledi.
Senattyń turaqty komıtetteri men depýtattarynan kelip túsken barlyq eskertpeler men usynystar salystyrma kestege jınaqtaldy.
Qujat Palata qaraýyna jiberildi.