Nazarbaev zııatkerlik mektepterinde uzaq merzimdi qamtıtyn «Urpaqtar sabaqtastyǵy» jobasy óz jumysyn bastady.
Jobanyń maqsaty – zeınet jasyndaǵy qarııalar men zııatker oqýshylardyń arasynda qarym-qatynas ornatý, jalǵyz turatyn qarttarǵa septesip, mektep ómirine aralasýyna yqpal etý. Shańyraq oqýshylarymen birlesken shyǵarmashylyq jumystar isteý arqyly ulttyq qundylyqtardy dáripteýde qarııalar men jas urpaqtyń sabaqtastyǵyn qalyptastyrý, rýhanı mádenıetin kóterý, adamgershilikke, eńbekke tárbıeleý.
Jýyrda zııatkerlik mektepter oqýshylary men ujymdary bir adamdaı daıyndalyp, Qarttar kúnine oraı osy aýqymdy jobany qolǵa alǵan. Osy oraıda Aqtaýdaǵy NIS qarııalarǵa izet kórsetý maqsatynda «Urpaqtar sabaqtastyǵy» fotokórmesin uıymdastyrdy. Mekteptiń bas dálizinde balalardyń ata-ájelerimen túsken sýretteri qaz-qatar ilinip, ystyq lebiz bildirý taqtaıshasy ornatylypty.
Qyzylordalyq zııatkerler aımaqtaǵy túrli salalarda qyzmet etken zeınetkerlerdi shaqyryp, qarııalardyń ómir jolyndaǵy kórgen qyzyq-qýanyshtary, jetken jetistikteri týraly áńgimelerin tyńdap, meımandarǵa merekelik konsert uıymdastyrdy, óz qoldarymen jasaǵan syı-sııapattaryn úlestirdi. Al Taldyqorǵandaǵy zııatkerlik mektep Almaty oblysynyń mamandandyrylǵan mekemeleri arasynda ózara yntymaqtastyq týraly memorandýmǵa qol qoıyp, eriktiler qozǵalysyn keńeıtýge jáne oqýshylardyń jahandyq jaýapkershiligin arttyrýǵa baǵyttalǵan áleýmettik jobalardy júzege asyrýǵa bekinip otyr.
Sondaı-aq Petropavl qalasyndaǵy mektep «Kópti kórgen kónemin!» atty is-shara uıymdastyryp, oblystaǵy ardager ustazdardy qonaqqa shaqyrǵan. Olarǵa mektepishilik ekskýrsııa jasalyp, oqýshylar óz ónerlerin kórsetti. О́skemendegi zııatkerlik mektep «Biz birgemiz» qaıyrymdylyq aksııasyn bastap, «Solnechnyı» kentindegi qarttar úıine ústel oıyndary men ádebı kitaptar jınaýdy qolǵa alsa, Semeıdegi NIS jobany erekshe formatta bastaýdy jón kórgen eken. Olar mekteptiń akt zalynda «Meıirimdilik pen qurmet kúni» ataýymen 11-synyp oqýshylary men pedagog-uıymdastyrýshy-kýratorlar konserttik elementteri aralas tok-shoý uıymdastyrǵan. Qonaqtarǵa túrli óner úıirmeleriniń tárbıelenýshileri daıyndaǵan sahnalyq qoıylymdar tartý etilgen.
Almaty qalasyndaǵy hımııa-bıologııalyq baǵytta bilim beretin oqý ordasy «Qarttarym – asyl qazynam» taqyrybymen tańǵy brıfıng uıymdastyryp, aǵa býyn ókilderine arnap án aıtyp, shabyttana óleń oqydy. «Atam men ájemniń sheberhanasy» degen ataýmen elordalyq fızıka-matematıkalyq baǵyttaǵy mektep sheberlik saǵattaryn uıymdastyrdy. Al Oral qalasyndaǵy zııatkerlik mektep oqýshylary bul kúni zaǵıp jandardyń úılerine baryp, kómek qoldaryn sozǵan. Sonymen qatar jýyq arada qarttar úıine baryp, «Qazaq ánderi» jobasymen tanystyratyn bolady.
Tarazdyqtar 50-ge jýyq jalǵyz basty qart pen áleýmettik ortalyq ókilderin bilim ordasyna shaqyryp, qolóner boıynsha sheberlik saǵattaryn ótkizdi. Pavlodar, Atyraý, Kókshetaý, Qostanaı, Qaraǵandy mektepteri de Qarttar úıi men arnaıy pansıonattarǵa baryp, óz ónerlerin kórsetip, qolóner buıymdaryn jasaý boıynsha, túrli sheberlik saǵattaryn ótkizýdi, aqtóbelikter qarttar úıinde sporttyq saıystar uıymdastyrýdy, al Almaty qalasynyń fızıka-matematıkalyq baǵyttaǵy mektep oqýshylary qarttar úıinde senbilik ótkizýdi josparlap otyrǵan kórinedi.
– Qoǵamdaǵy qarııalardyń orny men rólin kóterip, qarttar men oqýshylar arasynda urpaqtar sabaqtastyǵynyń nyǵaıýyna yqpal etýge tyrysamyz, – deıdi Zııatkerlik mektepterdi damytý departamenti dırektorynyń orynbasary Aıda Aǵadil. – Egde jastaǵy adamdardyń emosıonaldy jaǵdaıynyń jaqsarýy, kúndelikti ómirdegi belsendilikterin arttyrýǵa, jalpy volonterlik qozǵalysty keńeıtýde zııatkerlik mektepter tarapynan úles qosylsa degen oıymyz bar.
Bizdińshe, bul joba arqyly balalar urpaqtar sabaqtastyǵyn jalǵap, qaıyrymdylyq is-áreketteri arqyly úlkenderdi syılaýdy, qajet kezde qolǵabys berýdi, eń bastysy, ata-anasyna qamqor bolýdy úırenedi.