Jalpy jemqorlyqty jalpaq jurttyń talqysyna salyp, kóptiń kóńilin kúpti etken keleńsizdeý kórinedi. Olaı deıtinim, belgili top jasaǵan qylmysqa oǵan qatysy joq qoǵamdy qatystyrý ábestik sekildi. Qoly uzynnyń quzyryna qoly qysqanyń quryǵy áste jetpegen shyǵar…
Endi Qyzylorda oblysyndaǵy jaǵdaıdy tarqatyp kórelik. Jýyrda oblystyq ishki saıasat basqarmasynda sybaılas jemqorlyqqa qarsy kúres taqyrybynda ótken semınarda Sybaılas jemqorlyqqa qarsy is-qımyl agenttigi oblys boıynsha departamentiniń Prevensııa basqarmasynyń basshysy Ǵalııa Álimqulova tyń derekter usyndy. Ol: – Bıylǵy jyldyń 8 aıynda sybaılas jemqorlyqtyń aldyn alý maqsatynda 3750 shara uıymdastyryldy. Búginde «Ashyq bıýdjettiń ınteraktıvti taqtasy», «Adal urpaq», «Adal jol» jáne basqa da jemqorlyqty boldyrmaýǵa arnalǵan birneshe joba júzege asý ústinde. Al «Aqmeshit – adaldyq alańy» jobalyq keńsesiniń jumys aýqymy joǵary, – deıdi.
Esepti merzimde aımaqta 93 sybaılas jemqorlyq sıpatynda qylmys anyqtalǵan. Onyń ishinde 48-i paraqorlyq, 6-ýy júıeli túrdegi jemqorlyq, 8-i kishi jáne orta kásipkerlikke zańsyz aralasý, 17-si memlekettik baǵdarlamalardy iske asyrý barysynda oryn alǵan. Eń soraqysy, elimizde jyl saıyn orta eseppen eki myńnan astam sybaılas jemqorlyqqa qatysty qylmystyq is tirkelip, 1000-nan astam adam jaýapqa tartylady eken. Bul óz kezeginde memlekettik qyzmetke de kedergisin keltirip otyr. О́ıtkeni memleket qarjysyn jymqyrýda zańsyz áreketke baratyndar laýazym ıeleri ekeni beseneden belgili.
Osyǵan oraı basqarma basshysy jemqorlyqqa qarsy is-qımyl josparynyń negizgi jeti baǵytyn atap, qylmystyń jolyn kesý amaldaryna toqtaldy. Máselen, bıýdjet saıasatynyń ashyqtyǵy túıtkil saýaldyń túıini bolsa, «Open Space» jobasy bılik pen halyq arasyn jaqyndata tústi. Qysqasy, aqsha aınalasyndaǵy arpalysta shalys qadamnyń da shegi bolady.
Qanybek ÁBDÝOV,
Qyzylorda