Ázerbaıjannyń astanasy Baký qalasyna kelgen Qazaqstannyń Tuńǵysh Prezıdenti – Elbasy Nursultan Nazarbaev Túrki keńesine tóraǵalyq etken Qyrǵyzstan Prezıdenti Sooronbaı Jeenbekovpen kezdesti.
Elbasy Nursultan Nazarbaev ekijaqty kezdesý barysynda Túrki áleminiń yntymaqtastyǵyn odan ári nyǵaıtýdyń mańyzyna toqtaldy.
– Qazaqstan Túrki elderiniń barlyǵymen tyǵyz qarym-qatynas ornatqan. Búginge deıin Túrki elderi basshylarynyń kezdesýlerine túgel qatysyp kelemin. Men Keńestiń kóptegen ınstıtýtyn qurýǵa bastama kóterdim. Eń mańyzdysy – elderimiz arasyndaǵy beıbitshilik pen kelisimdi qamtamasyz etý, – dedi Elbasy.
Al Qyrǵyzstan Prezıdenti Sooronbaı Jeenbekov Elbasy Qazaq eline ǵana emes, Túrki elderine de qurmetti tulǵa ekenin atap ótti.
– Ortalyq Azııanyń, jalpy Túrki áleminiń órkendeýi úshin kóp jyldar boıy qyzmet etip kelesiz. Túbi bir týysqan halyqtardyń birligin nyǵaıtýǵa qosqan úlesińiz orasan zor. Túrkitildes memleketterdiń yntymaqtastyq keńesiniń Qurmetti Tóraǵasy bolyp tórge shyqqanyńyz qutty bolsyn. Men sizben maqtanamyn, – dedi S.Jeenbekov.
Orynbek О́TEMURAT,
«Egemen Qazaqstan» – Bakýden (Ázerbaıjan)