Túrkistan oblysy Saryaǵash aýdany, Qyzyljar aýyldyq okrýginde jańa dárigerlik ambýlatorııa paıdalanýǵa berildi.
Aýdan ortalyǵynan 16 shaqyrym jerde ornalasqan aýyl okrýginde emdeý ornynyń burynǵy ǵımaraty tozyǵy jetip, eskirgen bolatyn. Oblys ákimdiginiń qoldaýymen salynǵan medısınalyq mekemeniń ashylý saltanatyna oblys ákiminiń orynbasary Joldymurat Amanbaev, oblystyq qoǵamdyq densaýlyq basqarmasynyń basshysy Muqan Egizbaev jáne jergilikti turǵyndar qatysty. Halyqqa dárigerlik kómek kórsetýge arnalǵan jańa emdeý-profılaktıkalyq mekemesi zamanaýı medısınalyq jabdyqpen tolyq qamtylǵan. Halyq sany jeti jarym myńnan asatyn Qyzyljar aýyldyq okrýginiń jańa emdeý mekemesinde qyryqqa jýyq medısına qyzmetkeri jumys isteıdi. Ashylý saltanatyna qatysqan aýyl turǵyndary, endi dertine daýa izdep alysqa taban tozdyrmaıtyndaryn aıtyp, alǵystaryn bildirdi.