18 qazan - Rýhanı kelisim kúni merekesiniń qarsańynda Shymkent qalasynyń ákimi Erlan Aıtahanov dinı konfessııalardyń basshylaryn qabyldady. Kezdesýde qala ákimi dinı konfessııa basshylarymen din jumystary boıynsha pikir almasty. Sondaı-aq jıynǵa qatysýshylar dinaralyq qarym-qatynas máselelerin de talqylady. Bul týraly Shymkent qalasy ákimdiginiń baspasóz qyzmeti habarlady.
"Búgin ózderińizdi "Rýhanı kelisim kúni" merekesimen shyn júregimmen quttyqtaǵym keledi. Biz - kópkonfessııaly memleketpiz. Táýelsizdik alǵaly birligimizdiń arqasynda ósip-ónip kele jatyrmyz. Bizdi shetelde tatýlyqtyń etalony dep tanıdy. Biz osy yntymaq-birliktiń úlgisin ózimizden keıingi urpaqqa jetkizýimiz kerek. Aldaǵy jyly megapolısymyz TMD elderiniń mádenı astanasy atanbaq. Ol úshin jan jaqty daıyn bolýymyz kerek. Sizder de sol daıyndyqqa, qala turǵyndarynyń sanasyn ózgertýge, izgiliktiń dánin sebýge kómektesedi degen senimdemin" dedi Erlan Qýanyshuly.
Májilis barysynda Qazaqstan musylmandary dinı basqarmasynyń Shymkent qalasy boıynsha ókil ımamy, "Aqmeshit" ortalyq meshitiniń bas ımamy Baqtybaı Beısenbaev: "18 qazan - Rýhanı kelisim kúni" dep ataýdyń ózi din ókilderine degen úlken qurmet ekendigin aıtyp, memleketimizdiń salıqaly saıasatyn júrgizýge, turaqty dinı ahýal, mamyrajaı qoǵam qalyptastyrýǵa ózge din ókilderimen birlesip jumys isteıtindigin jetkizdi.
Sonymen qatar jıynda «Shymkent eparhııasynyń Shymkent qalasyndaǵy Svıato-Nıkolskıı kafedraldyq soborynyń prıhody» jergilikti dinı birlestiginiń dinı qyzmetshisi Aleksandr Mogılevskıı de óz oıyn jetkizdi. «Din de, dástúr de qoǵamda tynyshtyq pen tatýlyqtyń, yntymaq pen syılastyqtyń saltanat qurýyna qyzmet etedi. Dinı qyzmet salasyndaǵy memlekettik retteýdiń bir baǵyty – dinı ahýaldy zerdeleý jáne taldaý ekendigi belgili. Sondyqtan da, biz osy qalyptasqan ahýaldy sheshýdiń durys tetikterin qamtamasyz etý basty nazarymyzda» dedi A.Mogılevskıı.
Al, "Shymkent qalasynyń evreı qaýymy" jergilikti dinı birlestiginiń jetekshisi Zelık Mýrdýhaev bolsa mundaı mereke tek turaqty damyǵan Qazaqstan sııaqty memlekette ǵana toılanatynyn tilge tıek etti.
Jınalys sońynda qala ákimi konfessııa basshylaryna arnaıy alǵys hat pen syılyqtar tabystady.