Tańerteń qannen-qapersiz sabaǵyna bara jatqan stýdentti qala kóshesinde joǵary jyldamdyqpen júıtkip kele jatqan kólik qaqty da ketti. Basy bir jaqta, aıaǵy bir jaqta qaldy.
Jaqynda Atyraýda bolǵan bul jantúrshigerlik jol apaty týraly habar elge tez tarady. Bútin bir áýlettiń úmit kútip otyrǵan jalǵyz ulynyń osylaısha ajal qushqany, árıne ókinishti. Taǵy da ókinishtisi, mundaı mysaldar az emes. Jyl basynan beri jaıaý júrginshilerdi joldan ótkizbegenderi úshin aımaqta 1962 avtokólik júrgizýshisi ákimshilik jaýapkershilikke tartylǵan.
Oblystyq polısııa departamentiniń basshysy Berik Amangeldiniń aıtýynsha, ótken jyldyń sáıkes kezeńimen salystyrǵanda jol-kólik oqıǵalarynyń sany 31,7%-ǵa artqan, sondaı-aq jol-kólik oqıǵalarynan zardap shekkender kórsetkishi 49,5%-ǵa ósip otyr. Departament dereginde apat saldarynan kóz jumǵandar sany 7,8%-ǵa azaıǵany kórsetilgen. Degenmen, ásirese qalaaralyq jáne respýblıkalyq mańyzy bar joldarda keleńsiz jaıttar áli de kezdesedi. Osy másele kóterilgen selektorlyq májiliste oblystyń bas polıseıi jol-kólik oqıǵalaryna júrgizýshiniń jyldamdyqty arttyrýy, qarsy jolaqqa shyǵýy jáne áýesqoı avtomobılshilerdiń biliktilikteriniń tómendigi sebep bolyp otyrǵanyn aıtty.
О́ńirde túrli sanattaǵy júrgizýshilerdi daıyndaıtyn 26 avtomektep jumys isteıdi. «Azamattarǵa arnalǵan úkimet» memlekettik korporasııasy fılıalynyń dırektory Musa Haırýllıev avtomektepterdiń bilim sapasy kóńil kónshitpeıtinin jasyrmady. «Mysaly, 2018 jyly 9671 júrgizýshi kýáligi berilse, ótken jyldyń jeltoqsan aıynda mamandandyrylǵan HQKO ashylǵaly beri avtomektepterdiń túlekterinen 4419 qujat qabyldandy. Sonyń ishinen 419 tapsyrýshy ǵana teorııadan, 93-i tájirıbelik daǵdy synaqtarynan ótti. Bul júrgizýshilerdi daıyndaý sapasynyń tómendigin kórsetedi», dedi ol.
Oblys ortalyǵynda qoǵamdyq kólikter 30 baǵytqa qatynaıdy. Bıyl avtobýs parki jańartyldy. Sońǵy kezderi sol jańa avtobýstar da jıi jol-kólik oqıǵalaryna ushyrap júr. Qyrkúıek aıynyń sońǵy kúninde avtobýs pen júk kóligi soqtyǵysyp, 11 jolaýshy zardap shekti. Osy jaıttarǵa toqtalǵan oblys ákimi Nurlan Noǵaev: «Avtoparkterdiń basshylaryna avtobýs júrgizýshilerin jumysqa almas buryn baqylaýdy jáne únemi tekserip otyrýdy tapsyramyn. Búginde jolaýshylar bizdiń avtobýstarymyzǵa otyryp, baratyn jerlerine qaýipsiz, aman jetýlerine alańdaıtyn kúıge jetti», dep atap ótti.
О́ńirde jyl basynan beri jyldamdyq tártibin saqtamaǵandarǵa 41 hattama toltyrylǵan. Jol tártibin buzǵandardy jedel anyqtap, kólik apattarynyń aldyn alý úshin naqty sharalar atqarylyp jatqanyn da aıta ketýimiz kerek. Jaıaý júrginshiler jolyna projektorlar, joldarǵa – kameralar men jyldamdyq ólsheýishter, jyldamdyq báseńdetkish pen baǵdarshamdar ornatyldy. Qalada ortalyq kóshelerdi keńeıtý, oń jaqty aınalma joldar salý, jańa jol belgilerin ornatý jumystary qarqyndy júrýde. Aıtalyq, oblys ortalyǵyndaǵy Qulmanov kóshesinde 3D formatyndaǵy alǵashqy jaıaý júrginshiler joly salyndy. Jazataıym oqıǵalardyń aldyn alý jáne adamdardyń qaýipsizdigin qamtamasyz etýge baǵyttalǵan bul shara Atyraýda birinshi ret qolǵa alynyp otyr.
Jalpy jyl basynan beri qalada 315 jańa jol belgileri ornatylyp, jaıaý júrginshiler joly sońǵy úlgidegi jaryqtandyrǵyshtarmen jabdyqtalǵan. Mektepter men balabaqshalardyń aınalasyna jaryqdıodty shamdar ornatyldy. Sonyń ózinde kúre joldaǵy keleńsiz oqıǵalar azaıar emes. Jolda júrý qashan qaýipsiz bolady degen saýalǵa jaýap tabý da qıyn bolyp tur.
ATYRAÝ