Elordada Tamos ǵarysh mektebi ashylady

Saltanatty jıynda sóz alǵan memleket jáne qoǵam qaıratkeri, pro­fes­sor-ǵalym Ádil Ahmetov osy­dan shırek ǵa­syr buryn «Tamos Education» mek­te­biniń negizi qalanǵanyn, osy brendti ıemdenip otyrǵan jańa mektep­tiń bolashaqqa bereri mol bolaryna senetinin jetkizdi. «Úl­ken odaq ydyrap jatqan sonaý toqsanynshy jyldary bilim salasynda jańa brend qalyp­tas­tyrý – úlken batyrlyq. Son­daı ıgi istiń basy-qasynda Dáýren Qaýpynbaev júrdi. Lın­gvıstıkalyq jáne fızıka-mate­ma­tıkalyq baǵyttaǵy qos mektep bilim berý naryǵynda 25 jyldan beri júıeli jáne jemisti jumys istep keledi. Mine, búgin úlken is qolǵa alynyp otyr. Memleket basshysy Qasym-Jomart Toqaev sabaqtastyqpen qatar progress keregin aıtty. Bilim men ǵylym alǵa jyljymaıyn­sha damý bolmaıdy», dedi. Onyń oıynsha, tehnıka men tehnologııa salasynda mamandar daıarlaý turǵysynan elimiz áli mesheýleý, álem elde­ri­men salystyrǵanda artta keledi. Sondyqtan bas qalada mundaı mektep irgetasynyń qalanýy asa mańyzdy. О́ıtkeni jańa zamanǵa ǵaryshty ıgeretin jańa mamandar kerek. Al sapaly kadrlardyń bilim-bilik daǵdylary osyndaı mektepte qalyptasady.

Jeke mektepti jeke ınvestor­lar Dáýren Qaýpynbaev pen Baqtııar Bekojanov malaızııalyq «Kind Devolopment» kompanııa­symen birlesip qolǵa alyp otyr. Quryltaıshylardyń biri B.Bekojanovtyń aıtýynsha, bilim osha­ǵy 2020 jylǵy jańa oqý jylynda oqýshylarǵa esigin ashady. Aldymen fızıka-matematıka baǵy­ty boıynsha 0-4 synyptarǵa balalar qabyldanatyn kórinedi. «Mektep 3 qabatty bolady, 800 orynǵa laıyqtalǵan. Mekteptiń artynda qosymsha eki ǵımarat boı kóteredi. Onda sport zal men ashana bolady. Qazirgi tańda qurylystyń oryny belgilendi, keler jyly qyrkúıekte iske qosýdy josparlap otyrmyz. Árıne biz memlekettiń qoldaýyn­syz osyndaı aýqymdy jáne ja­ýap­­kershiligi zor jobany bas­ta­mas edik. Osy oraıda elorda ákimdigine alǵys aıtamyz», deıdi. Atalǵan ınvestor óz qarjysyn qaıtarýdan buryn balalardyń bilim alýyna jaǵdaı jasaýdy kózdeıtinin tilge tıek etti. Onyń paıymdaýynsha, bul – bolashaqqa salynǵan ınvestısııa.