Elordada Nur Otan partııasynyń ǵımaratynda Otandastar qory «Adam jáne etnostyq azshylyqtar quqyqtaryn qorǵaý» taqyrybynda dóńgelek ústel jıynyn ótkizdi.
Búginde kóptegen shetelde konstıtýsııalyq jáne basqa da zańnamalyq deńgeıde túrli ulttyq, etnostyq azshylyqtardy qorǵaýdy qamtamasyz etýge, sondaı-aq olardyń ózindik jáne jeke erekshelikterin saqtaýǵa baǵyttalǵan belsendi is-sharalar júzege asyrylýda. Mundaı bastamalardyń maqsaty – halyqaralyq normalar men standarttardyń yqpalymen qalyptasqan árbir elde az ulttardyń ómir súrýiniń ınstıtýsıonaldyq jaǵdaılaryn qamtamasyz etý, memleket pen qoǵamnyń demokratııalyq ınstıtýttarynyń júıesin jetildirý. Osy taqyryp keńinen talqylanǵan alqaly jıynda «Otandastar qorynyń» vıse-prezıdenti Maǵaýııa Sarbasov Qazaqstan qazirgi tańda shetelderde turatyn qazaqtarǵa qandaı qoldaý kórsetip jatqanyn aıtyp berdi.
– Bizdiń uıym arnaýly Jol kartasyn jáne qordyń damý josparyn ázirlep, bekitti. Josparǵa sáıkes birqatar qyzmet túri anyqtaldy. Olar – shetelderde qazaqtardy qoldaý jáne erikti qonys aýdarý jónindegi memlekettik baǵdarlamany ázirleý, sheteldegi otandastardy memlekettik qoldaý týraly zań jobasyn ázirleý, otandastardy aqparattyq qoldaý ortalyǵynyń jumysyn úılestirý, dıalog alańdarynyń qyzmetin úılestirý, shetelde qazaq tilin oqytý boıynsha bilim berý ınfraqurylymyn qurý. Qazirgi kúni qandastardy qoldaý jáne olardy tarıhı otanyna qaıtarý boıynsha shet- elderdiń tájirıbesi zerdelenip, arnaıy saraptamalyq zertteýler júrgizilýde, – dedi M.Sarbasov.
Budan keıin Prezıdent janyndaǵy Adam quqyqtary jónindegi komıssııasynyń tóraǵasy Qýanysh Sultanov sóz alyp, atalǵan saladaǵy halyqaralyq birlesken is-sharalarǵa toqtaldy.
– Búgingi kún tártibindegi taqyryp qashanda nazardan túsken emes. Adam quqyqtarynyń jalpyǵa birdeı deklarasııasynyń qabyldanǵan kúnin jylda 10 jeltoqsanda atap ótemiz. Sol kezde turaqty túrde barlyq halyqaralyq uıymdar men elshilikter ókilderin shaqyryp, jan-jaqty pikir almasamyz. Adam quqyǵy – memlekettik saıasattyń basym baǵyty, eń joǵary qundylyǵy. Uly dala eli ejelden qarapaıym halyqtyń quqyqtary men bostandyqtaryn joǵary qurmettep, bul el basqarýdaǵy úrdisterde, ishki jáne syrtqy saıasatta erekshe eskerilgen. Qazaqstan adam quqyǵy jóninde 100-den asa kópjaqty halyqaralyq kelisim jasaǵan. Onyń ishinde BUU-nyń quqyq qorǵaý týraly konvensııalary bar. Bizdiń elde adam quqyqtaryn qorǵaýdyń ulttyq júıesi jolǵa qoıylǵan. Onyń mańyzdy bir quraly retinde Prezıdent janyndaǵy Adam quqyqtary jónindegi komıssııasyn ataýǵa bolady. Komıssııa Qazaqstan azamattarynyń, sheteldik azamattardyń, azamattyǵy joq adamdardyń, sondaı-aq uıymdardyń azamattyń quqyqtary men bostandyqtarynyń buzylý faktileri týraly ótinishterin qaraıdy. Memleket basshysynyń atyna adam quqyqtarynyń saqtalýy týraly jyl saıyn arnaýly baıandamalar ázirleıdi. Komıssııanyń negizgi mindetiniń biri – adam quqyqtary men bostandyqtaryn qamtamasyz etý men qorǵaý salasyndaǵy halyqaralyq yntymaqtastyqty nyǵaıtýǵa járdemdesý, – dedi Q.Sultanov
Sonymen qatar basqosýda Aqparat jáne qoǵamdyq damý mınıstrliginiń Etnosaralyq qatynastardy damytý departamenti dırektory Ǵalym Shoıkın sóılep, etnosaralyq jáne konfessııaaralyq kelisimdi saqtaý elimiz úshin árqashan basym baǵyt bolyp qala beretinin aıtty. Ol mınıstrlik etnostyq buqaralyq aqparat quraldaryn belsendi qoldaıtynyn, Qazaqstanda 12 tilde taratylatyn 52 etnostyq BAQ jumys isteıtinin atap ótti.
Jıyn sońynda shetelde turatyn etnostyq qazaqtardyń quqyqtaryn qorǵaý maqsatynda halyqaralyq deńgeıde halyqaralyq úkimettik jáne úkimettik emes uıymdarmen ózara is-qımyl máseleleri boıynsha usynymdar qabyldandy.