Nátıjeli jumyspen qamtýdy jáne jappaı kásipkerlikti damytýdyń 2017–2021 jyldarǵa arnalǵan baǵdarlamasy aıasynda «Bastaý» kásipkerlikke baýlý synyptarynda arnaıy oqytý ortalyqtary ashylyp, oǵan múmkindigi shektelgen jandardy barynsha tartý sharalary qolǵa alynǵan. Sondaı ortalyqtyń biri Almaty qalasyndaǵy «Úmit» múgedekterdi qoldaý ortalyǵynda jumys isteıdi. Munda óz kásibin ashqysy keletin 40-tan azamat dáris alyp, kásipkerlik negizderin úırenýde.
«Úmit» múgedekterdi qoldaý ortalyǵynyń jumysymen tanysýǵa kelgen Parlament Májilisiniń Qarjy jáne bıýdjet komıtetiniń múshesi Irına Smırnova jáne Almaty qalasy Kásipkerler palatasynyń dırektory Narıman Ábilshaıyqov «Bastaý» jobasy aıasynda jeke kásip ashýǵa mashyqtanyp jatqan jandarmen tanysyp, olardyń usynys-pikirlerin tyńdady.
Depýtat I.Smırnova olardyń qoǵamnan oqshaý qalmaı, kózi kórmeı, qulaǵy estimegenimen, jeke kásibin bastaýǵa qulshynys bildirip, oqý baǵdarlamasyn ıgerýge barynsha kúsh-jigerlerin salyp otyrǵandyǵyna rızashylyǵyn bildirdi. Olardyń qoǵamnan tys qalmaı, eriktiler qozǵalystary qatarynda belsendi bolyp júrýi deni saý azamattarǵa úlgi bolatyn ıgi is.
Almaty qalasy Kásipkerler palatasynyń dırektory Narıman Ábilshaıyqov óz kezeginde «Bastaý» jobasy boıynsha bilim alýǵa ynta bildirip, qoǵamǵa aýyrtpashylyǵyn artpaı, ózdiginen jeke kásibin ashyp, tabys tabýǵa belesene kirisken jandarǵa sát-sapar tileı otyryp, qaladaǵy oqytý baǵdarlamalarynyń barysyna toqtalyp ótti.
Aǵymdaǵy jyldyń jeltoqsan aıyna deıin 3 kezeń boıynsha 4250 adamdy oqytý josparlanyp otyrsa, «Jas kásipkerlik» baǵytynda 2650 talapker bilim alatyn bolady. Qazirgi kezde qalada 34 klasstyń jumysy jolǵa qoıylǵan. Onyń biri «Úmit» múgedekterdi qoldaý ortalyǵynda bolsa, 7-ýi «Baqytty otbasy» kóp balaly analar ortalyǵy janynan ashylǵan. Baǵdarlama bastalǵan ýaqyttan beri qalada 7000-nan astam adam kásipkerlik negizderin ıgergen. Olarǵa 505 teńge mólsherinde grant bólinetin bolsa, óz bıznesin damytý úshin 6 paıyzdyq nesıe alýǵa múmkindigi de qarastyrylyp otyr. Mundaı ortalyqtarda múgedekter úshin sýdoaýdarma júıesi, qajetti tehnıkalyq jabdyqtar da jasaqtalǵan.
«Úmit» múgedekter ortalyǵynyń dırektory Amanbıke Erǵalıeva estý jáne kórý qabileti nashar adamdarǵa arnalǵan mamandandyrylǵan synypqa barý, onda kásipkerlik negizderine oqytý jumystary ymdaý tiliniń túsindirmesin qoldana otyryp júzege asatyndyǵy men munda psıhologtar, bıznes dáriskerler sııaqty kásipqoı mamandar jumys isteıtindigine toqtaldy.
Al alǵashqy kezde múgedek jandarmen jumys isteýdiń asa qıyn bolǵandyǵyn jetkizgen bıznes dárisker Aıgúl Jaılybaeva árbir azamatqa jeke-jeke kóńil bólip, olardyń oı-pikirine nazar aýdarý mańyzdylyǵy týrasynda aıtyp ótse, «Baqytty otbasy» áleýmettik ortalyǵy Alataý aýdany boıynsha úılestirýshisi kópbalaly ana Aqmaral Basırova múmkindigi shekteýli bola tura jeke kásibin ashqysy keletin azamattarǵa rýhanı jáne materıaldyq qoldaý kórsetý, ári bul iske jergilikti ákimdikterdiń de belsene qatysýy asa mańyzdy. О́ıtkeni múdegek jandarǵa, kóp balaly jaǵdaıy nashar analarǵa jan-jaqty qoldaý kórsetý olardyń qoǵamda áleýmettenýine barynsha yqpal etedi.
«Úmit» ortalyǵynan keıin jumys toby «Bastaý» ortalyqtaryn aralap, jeke kásip bastaǵan kásipkerlerdiń jumystarymen tanysty.
ALMATY