Abaıtanýshy, professor, fılologııa ǵylymdarynyń doktory Mekemtas Myrzahmetuly búginde Túlkibas aýdanynyń Maıtóbe aýylynda turady. Tabıǵaty erekshe, ataýy aıtyp turǵandaı, topyraǵyna shybyq qadasań, shynar ósetin aýylda ómirin ǵylymǵa sarp etip, kóz maıyn taýysyp júrgen ǵalymǵa jerlesteri baspana tartý etti.
Osy oraıda esimizge M.Myrzahmetovtiń bir suhbatynda jadynan óshpeıtin eń aýyr kún retinde asharshylyq kezindegi oqıǵany aıtqany túsip otyr. «Náýbet bastalǵanda men 4 jasta edim. Sheshem meni qolynan tastamaı kóterip júretin. Stansa men aýyldyń arasy 2,5-3 shaqyrym. Ákem usta bolatyn. Azdap altynymyz boldy. Sony satyp kún kórdik. Keıin ákemizdi baı-qulaq dep tutqyndady. Túrmede jatyp kóz jumdy. Úıimiz eýropalyq úlgide salynǵan, edeni taqtaılanǵan jaqsy úı edi. О́rtep jiberdi. Úıdiń ortasynda tireý bolǵan. Ákem tireýdiń bir jerin bildirmeı oıyp, soǵan altyn saqtaıtynbyz. Úımen birge órtenip ketti. Bári áli kúnge deıin kóz aldymda», degen-di suhbatynda M.Myrzahmetuly. Osy bir oqıǵany ǵalym kúni keshe syıǵa tartý etilgen baspana kiltin alǵan kezde de esine alǵan bolar. Aýylda qarapaıym tirshilik etip júrgen aǵamyz baspanasyz emes-ti. Degenmen aýdan ákimi bastamashyl bolyp, jerlesteri jańa da jaıly úı salyp berýdi uıǵarypty. Osy oraıda aıta ketelik, Túlkibas aýdanynyń ákimi Nurbol Turashbekovti jurt rýhanııatqa janashyr, jańashyl basshy retinde de qurmetteıdi. Shaǵyn jáne orta kásipkerlik damyp, turǵyndardyń áleýmettik jaǵdaıy jaqsara túsken Túlkibasta sońǵy jyldary aqyn-jazýshy, ǵalymdar men jýrnalısterge túrli baǵytta kóptep qoldaý kórsetilip keledi. Mekemtas Myrzahmetulyna jańa da záýlim úıdiń kiltin tabystaý rásiminde aýdan ákimi: «Birazdan beri bizde Mekemtas aǵamyzǵa týyp-ósken jerinen baspana soǵyp bersek degen nıet boldy. Osy baspanada aǵamyz shyǵarmashylyqpen emin-erkin aınalyssa degen maqsattaǵy nıetimiz iske asyp, búgin qýanyshty bólispekpiz. Bul úı aǵamyzǵa aýdan halqynyń atynan berilip otyr», deı kele úıdi salýǵa úles qosqan demeýshilerge alǵysyn bildirdi. Al oblystyq ardagerler keńesiniń tóraǵasy Jeńisbek Máýlenqulov Mekemtas Myrzahmetulynyń ótken ómiri men shyǵarmashylyq jolyna kóz júgirtip, qazaq ǵylymynyń damýyna qosqan úlesi sheksiz ekenin jetkizdi. О́z kezeginde Mekemtas aǵa jerlesterine alǵysyn bildirip, sol jerlesterin ıgi iske jumyldyra bilgen aýdan ákimi Nurbol Turashbekovtiń jumysyna sáttilik tiledi.
Sondaı-aq bul kúni aýdandyq «Shamshyraq» qoǵamdyq-saıası gazetiniń redaksııasynda Túlkibas óńirine esimi tanymal aqyn Ábdibek Aralbaıuly men uzaq jyldar boıy aýdandyq gazette qyzmet etken jýrnalıst Oryntaı Kómekovtiń kitaptarynyń tusaýkeseri ótti. «Izde meni» kitabynda arqaly aqyn Ábdibek Aralbaıulynyń sońǵy jyldary jazǵan óleńderi toptastyrylǵan. Al, «Endi gúlge jolamaspyn» – Oryntaı Kómekovtiń alǵashqy kitaby. Qalyń kitapta jýrnalıstiń osy ýaqytqa deıin ázil-syqaq, tylsym dúnıe taqyryptarynda jazǵan dúnıeleri toptastyrylǵan. Tusaýkeser rásiminde Mekemtas Myrzahmetuly basylyp shyǵýyna aýdan ákimi yqpal etken kitap ıelerine shyǵarmashylyq tabys tiledi.
Túrkistan oblysy