Zaǵıp jáne nashar kóretinderge arnalǵan respýblıkalyq kitaphanada «Kómektes» qory jáne Qazaqstan halqy assambleıasynyń uıymdastyrýymen ártúrli ult ókilderiniń arasynda «Meniń elim» 7-shi qazaq ánderiniń baıqaýy ótti. «Kómektes» qorynyń tóraǵasy Aleksandr Sapelkınniń aıtýynsha, baıqaý el Táýelsizdiginiń 28 jyldyǵy men Elbasy jarııalaǵan Jastar jylyna oraılastyrylyp otyr.
Baıqaý barysynda Almaty, Taraz jáne Esik qalalarynan kelgen 14 oqýshy qazaq áýenderin shyrqady. N.Ostrovskıı atyndaǵy mektep oqýshysy Darıa Ýmerova, Esik mektebinen Baýyrhan Ońǵarbaev I oryndy ıelendi. Qazylar alqasynyń tóraıymy, Qazaqstan Respýblıkasynyń halyq ártisi Aıjan Nurmaǵambetova, Darıa Ýmerova men Laýra Ábdiǵuldy «Baqyt degen seniń bala kúnderiń» atty respýblıkalyq televızııalyq mýzykalyq balalar festıvaline kastıngke shaqyrdy. Al eresek qatysýshylar arasynda I oryndy Aıjan Joldybekova jeńip aldy. Odan keıingi oryndy Chaıkovskıı atyndaǵy mýzykalyq kolledj túlegi Krıstına Jelýdkova ıelendi.
Qazylar alqasynyń múshesi, kompozıtor Bekbolat Oralbekov jas vokalısterdiń jetekshilerine keńester berdi.
Baıqaýǵa «Pharm Express» JShS jáne «STS Azııa grýpp» JShS demeýshilik jasady. «Kómektes» qorynyń Maqtaý gramotasy men baǵaly syılyqtaryn turaqty demeýshi, jas bıznesmen Igor Gýbarevtyń anasy Lıýdmıla Valentınovna tabys etti. Basqa qatysýshylar yntalandyrý syılyqtarymen marapattaldy.
Qazaqstan Halqy assambleıasy atynan Kazbek Mamsýrov Igor Gýbarevqa Alǵys hat tabys etti. Baıqaýdyń maqsaty kózi nashar kóretin jandardy patrıottyqqa tárbıeleýge, qazaq tilin, qazaqtyń mýzykalyq mádenıetin úırenýge yqpal etý. Kelesi jyly «Kómektes» kózi nashar kóretin múgedekter qory «Meniń elim» 8-shi baıqaýy qarsańynda óz qyzmetiniń 25 jyldyǵyn atap ótedi.