«LORD» mektep-lıseıiniń jetinshi synyp oqýshysy Mıras Barıev «Artek» lagerinde ótken «Bizdiń batyrlar» atty halyqaralyq baıqaýdan jeńimpaz bolyp oraldy.
Munda TMD elderinen jınalǵan 7-10 synyp aralyǵyndaǵy 12 myńǵa jýyq bala óz jobalaryn qorǵap, baq synasqan. Mıras uly otan soǵysynyń ardageri, jerlesimiz Pıotr Gladkovtyń ómiri men erligin óz shyǵarmasyna arqaý etip, jatyq tilmen jazyp shyqqan.
«Tolarsaqtan saz keship, ot pen oqtyń arasynda júrip, jas urpaqqa beıbit ómir syılaǵan aǵa urpaqty qasterleý –bizdiń qasıetti paryzymyz», deıdi bas júlde ıegeri.
Daryndy balalarǵa mamandandyrylǵan «LORD» mektep-lıseıiniń orys tili jáne ádebıeti páni muǵalimi Sáýle Myrzabaevanyń aıtýynsha, baıqaýdyń birinshi kezeńine 12 myń úmitkerden tek 34-i ǵana iriktelinip alynǵan. Olardyń ishinen qazylar alqasy úsh qatysýshyny bas júldege laıyq dep tapqan.
Mıras jobany odan ári damytyp, jetildirip, jerlesimiz týraly kitap jazbaq oıyn jasyrmaıdy.