Túrkistan oblysynyń Túlkibas aýdanynda erekshe saılaý ótti. Aýdan turǵyndary taptaýryn jınalystar emes, ashy shyndyq aıtylǵan pikirsaıystarǵa da kýá boldy. О́z aýyldastarynyń arasynan shyqqan elge janashyr belsendi azamattardyń az emes ekenin ańǵardy, qadamdaryn baıqady. Qarapaıym turǵyndar arqyly jergilikti ákimdik aýdandaǵy túıtkildi máselelerge qanyqty deýge bolady. Retimen baıandasaq.
Elbasy, Nur Otan partııasynyń Tóraǵasy N.Nazarbaev «Senim. Dıalog. Bolashaqqa nyq qadam – Nur Otan partııasynyń 7 serpini» atty partııany jańǵyrtý baǵdarlamasy aıasynda saıası uıym qataryna otanshyl, elge janashyr azamattar tartylsyn degen talap qoıǵan bolatyn. Sol mindetke sáıkes, Túlkibas aýdanynda Nur Otan partııasynyń kadrlyq rezervine úmitkerlerdi irikteý júrgizildi. Qazannyń aıaǵynda bastalǵan qanatqaqty joba 16 qarashada túıindeldi. Nur Otan partııasy Túrkistan oblystyq fılıaly tóraǵasynyń birinshi orynbasary Beısenbaı Tájibaevtyń aıtýynsha, bul joba – azamattyq qoǵamdy qalyptastyrý úshin asa mańyzdy qadam. «Partııanyń kadrlyq rezervine irikteýdiń basty maqsaty – saıası uıymnyń ıadrolyq elektoratyn qalyptastyrý. Eldiń jáne partııanyń múddelerin jańa kózqaraspen qorǵaı biletin, elge adal qyzmet etetin azamattardy tartý. Búginde partııa tóraǵasy, Elbasymyz Nursultan Nazarbaevtyń tapsyrmasyna sáıkes, partııany qaıta jańǵyrtý jumystary júrip jatyr. Al jańa mindetterdi júzege asyrýda jańa belsendiler, partııa janashyrlary men otanshyl qaıratkerler qajet. Qarapaıym turǵyndar arasynan kóshbasshylardy irikteý maqsatynda elimiz boıynsha árbir oblysta bir aýdannan kadrlyq rezervke irikteý qanatqaqty jobasy bastaldy. Túrkistan oblysy boıynsha Túlkibas aýdany tańdalyp alyndy. Partııanyń kadrlyq rezervine irikteý jobasyn júzege asyrýǵa joǵary daıyndyq júrgizilip, fılıaldar tarapynan naqty jumystar atqaryldy. Sonyń nátıjesinde basqa oblystarmen salystyrǵanda kadrlyq rezervke tirkelgen úmitkerler sany boıynsha Túlkibas aýdany kósh bastady. Bul óńirimizde saıası belsendiliktiń joǵary ekenin bildiredi», – deıdi B.Tájibaev.
Aldymen Nur Otan partııasynyń Túlkibas aýdandyq fılıalyna qarasty 23 bastaýysh partııa uıymynda túsindirý jumystary júrgizilip, kandıdattar ashyq jáne ádiletti túrde tirkelgen. Irikteý jumystary partııanyń ortalyq apparaty bekitken nusaýlyqqa saı atqarylyp, úmitkerler bastaýysh partııa uıymdaryna tanystyrylǵan. Partııalyq kadrlyq rezervine irikteý jumystary nátıjesinde 100 úmitker tirkeldi. Onyń ishinde 60 er, 40 áıel baq synaýdy jón kórgen. Jas erekshelikterine oraı tirkelgen úmitkerler arasynda 35 jasqa deıin 21 adam, 35-50 jas aralyǵynda – 38, 50 jastan joǵary 41 adam, sondaı-aq 7 kóp balaly ana da ózin usynǵan. Qorytyndy debattar men daýys berý kezeńine 96 úmitker ótti. Qanatqaqty joba boıynsha 5-15 qarasha aralyǵynda kandıdattar ózderiniń baǵdarlamalary men usynystaryn tanystyrý úshin aýdannyń ár aýylynda bolyp, partııa múshelerimen kezdesýler men debattar ótkizgen.
Tirkelgen úmitkerlerge daýys berý 16 qarashada aýdannyń 15 aýmaǵynda ashyq jáne erkin túrde ótkizildi. Sóıtip aýdandaǵy Nur Otan partııasynyń 6 myńnan astam jáne «Jas Otan» jastar qanatynyń myńnan astam múshesi óz tańdaýlaryn jasady. О́z aýyldarynan shyqqan jańa kóshbasshylardy qoldaǵan túlkibastyqtar bılik tarmaǵyna azamattar osylaı tańdalǵany jón dep esepteıdi.
Túrkistan oblysy