«Egemen Qazaqstan» gazetiniń 22 qarashadaǵy sany Elbasy Nursultan Nazarbaevtyń «Tyraýlap ushqan tyrnalar» spektaklin tamashalaǵany týraly aqparatpen bastalyp, Memleket basshysynyń jáne Elbasynyń jańa ǵasyrǵa qadam basqan ata basylymnyń ǵasyrlyq toıymen quttyqtaǵan hatymen jalǵasty.
Júz jyldyqqa arnalǵan «Qazmedıa» ortalyǵynda ótken sharapatty shara týraly «Egemenniń» toıy – eldiń toıy» atty maqaladan oqýǵa bolady. Atalǵan jıynǵa qatysqandar ǵasyr jasaǵan ǵıbratty basylymnyń ótkenin saralady. Búginin baǵalady. Bolashaǵyna aqjol tiledi.
Gazettiń osy sanynan mańyzdy májilister de, keleli kezdesýler de, saıası saraptamalar da oryn aldy.
Sonymen qatar qalamger Qalı Sársenbaı «Aqańnyń amanaty» degen maqalasynda Aqseleý Seıdimbek jaıly esti estelikterimen bólisip, «Qazaqqa úsh Aqańdy – Ahmet (Baıtursynuly), Ahmet (Jubanov), Aqseleýdi (Seıdimbekti) bergen HH ǵasyrǵa myń taǵzym! Búgingi essizdeý, kesirli qoǵamnyń kózimen qarasaq, osylar bolmaǵanda biz rýhanı músəpirliktiń qursaýynda qalǵanymyz qalǵan eken» dep túıindeıdi maqalasyn.
Mádenı sharalar men áleýmettik mańyzdy maqalalardy «Almaty» betinen oqı alasyzdar.
Nur-Sultan, Almaty, Shymkent qalalarynan bólek óńirlerdegi ózekti jańalyqtardy bilgińiz kelse, gazettiń 22 qarashadaǵy sanyn nemese egemen.kz saıtyn oqyńyzdar.