Qyzylordadaǵy «Slavıane» qoǵamdyq birlestiginiń uıymdastyrýymen Uly Otan soǵysy jyldarynda qaza tapqan jaýyngerler jerlengen baýyrlastar zıratynda mıtıng bolyp ótti. Oǵan «Qoǵamdyq kelisim» KMM dırektorynyń orynbasary Asylbek Jumabaev, qalalyq ishki saıasat bóliminiń basshysy Rýslan Kaıýpov pen I.V. Panfılov atyndaǵy №5 mektep lıseıiniń dırektory Altyn Izbasova, etnomádenı birlestiktiń jetekshileri men músheleri, qalalyq áskerı komıssarıat ókilderi, ardagerler keńesiniń músheleri, aýǵan jaýyngerleri, qala jastary qatysty.
Birlestik jetekshisi Galına Sherbakova sharanyń mańyzy týraly aıtyp ótti.
- Reseı Federasııasynyń Qorǵanys mınıstrligi keler jyly atap ótiletin Uly Jeńistiń 75 jyldyǵy aıasynda Otan úshin janyn qıǵan jaýyngerler rýhyna arnalǵan «Eske alý joly» jobasyn bastady. Joba aıasynda Reseı Federasııasyndaǵy «Patrıot» memorıaldyq keshenine maıdanda qaza tapqan soldattar jerlengen zırattardan jınalǵan topyraq saltanatty túrde tabystalady. Osyǵan oraı Reseı Federasııasynyń Almaty qalasyndaǵy Bas konsýldyǵy bastamasymen baýyrlastar zıratyna jınalyp turmyz, - dedi.
Mıtıng aıasynda №5 mektep lıseıiniń oqýshylary shaǵyn ádebı-mýzykalyq qoıylym qoıyp, el qorǵaǵan atalarynyń rýhyna qurmet tanytty. Keńes Odaǵynyń Batyry I.V. Panfılov esimin ıelengen bul oqý ordasy yntymaq pen birlikti nasıhattaý baǵytynda «Slavıane» ortalyǵymen tyǵyz baılanysta jumys jasaıdy. Osy jyly mektep basshylyǵy Reseı kúnin merekeleýge baılanysty Almatynyń Bas konsýldyǵyndaǵy saltanatty qabyldaýǵa da shaqyryldy.
Baýyrlastar zıratynan alynǵan topyraq arnaıy reıspen Máskeýge jóneltiletin bolady.