Almaty qalasynyń Sybaılas jemqorlyqqa qarsy qyzmeti «Aýyr atletıkadan olımpıadalyq daıarlaý ortalyǵy» RMQK basshysy men osy kásiporynnyń bas esepshisi para aldy degen kúdikpen sotqa deıingi tergeýdi bastady.
- Olar aldyn ala sóz baılasyp, Jambyl oblysynda oqý-jattyǵý jıyndaryn ótkizý boıynsha Memlekettik satyp alý týraly jasalǵan kelisim-shartqa syıaqy retinde kásipkerden 6 mln 625 myń teńge kóleminde para aldy dep kúdiktelýde. Bıylǵy jyldyń 17 jeltoqsanyna atalǵan tulǵalar ustalyp, Almaty qalasy IID ÝUI-yna qamaldy, bultartpaý sharasyn tańdaý máselesi sheshilýde. Sotqa deıingi tergeý jalǵasýda. Kúdiktilerge qatysty olardyń kinálilik dárejesin anyqtaýmen túpkilikti sheshimdi sot shyǵarady, - delingen habarlamada.