Jańa jyldyń alǵashqy kúnderinde Nur-Sultan, Almaty jáne Shymkent qalalarynda ótken respýblıkalyq pándik olımpıadada Qyzylorda qalasyndaǵy Nazarbaev Zııatkerlik mektep oqýshylary bilim bıiginen kórinip, 4 kúmis jáne 3 qola medal ıelendi. Bul týraly Qyzylordadaǵy NZM baspasóz qyzmeti habarlady.
Nazarbaev Zııatkerlik mektepter jelisinde dástúrli túrde ótkiziletin pándik olımpıadaǵa elimiz boıynsha 800-ge jýyq oqýshy qatysyp, bilimderin ortaǵa saldy. Nur-Sultan qalasyna jınalǵandar Qazaqstan tarıhy, quqyq negizderi, matematıka jáne fızıka pánderinen saıysqa tússe, qazaq, orys, aǵylshyn, nemis, fransýz tilderiniń bilgirleri Shymkenttegi fızıka-matematıka baǵytyndaǵy Zııatkerlik mektepte ózara baq synasty. Al Almatydaǵy hımııa-bıologııa baǵytyndaǵy Nazarbaev Zııatkerlik mektebinde olımpıada qatysýshylary ınformatıka, hımııa, bıologııa, geografııa pánderi boıynsha bilim talastyrdy.
Naǵyz bilimdi anyqtalar baıqaýda qyzylordalyq órender júldeli jeti orynǵa ıe boldy. Atap aıtqanda, 11-synyp oqýshysy Aıym Seksenbaeva jáne 10-synyp oqýshysy Áıgerim Turmahanova qazaq tili men ádebıeti páninen úshinshi jáne ekinshi oryndardy aldy. Al 11-synyp oqýshysy Gúlshat Qalbaeva men mektep bitirýshi Saodat Qurmanaeva orys tili páninen kúmis medalǵa qol jetkizdi. 10-synyptaǵy Jangereı Zeınelov pen 11-synyptan Ádil Dastan olımpıadada Qazaqstan tarıhy páni boıynsha saıysqa túsip, ekinshi jáne úshinshi oryndardy ıelendi. Sonymen qatar geografııa páninen de oqýshylar úzdik nátıje kórsetip, 11-synyp oqýshysy Álisher Altynbasov qola medalmen marapattaldy.