Iran Prezıdenti Hasan Rýhanı Ýkraına Prezıdenti Volodımır Zelenskıımen telefon arqyly sóılesip, ushaq apatyna baılanysty kóńil aıtty dep habarlaıdy Habar 24.
Iran basshysy qaıǵyly jaǵdaıǵa kináliler jaýapkershilikke tartylatynyn jetkizdi. Hasan Rýhanı ushaq apaty ırandyq áskerılerdiń qateliginen bolǵanyn tolyqtaı moıyndaıtyndaryn málimdedi. Al Volodımır Zelenskıı "halyqaralyq quqyq talaptaryna saı ózara konstrýktıvti is-áreket kútemiz, ýkraınalyq laınerdiń ekıpajy barlyq erejelerge sáıkes ushty" dedi.
Eske salsaq, 8 qańtarda Iranda qaıǵyly oqıǵa boldy: Tegeran áýejaıyna jaqyn mańda ýkraınalyq ushaq qulady. Tótenshe jaǵdaı saldarynan 167 jolaýshy men ekıpajdyń toǵyz múshesi qaza tapty. Ushaq bortynda Aýǵanstan, Germanııa, Iran, Kanada, Ýkraına, Ulybrıtanııa jáne Shvesııa azamattary bolǵan.
Osyǵan deıin Iran bıligi áýe apatyna baılanysty tergeýdiń alǵashqy nátıjelerin jarııalady. Olardyń málimetinshe, ýkraınalyq ushaq áýede órtengen. Ushaq áýejaıǵa keri qaıtqan, alaıda ekıpaj músheleri dıspetcherlerge eshteńe aıtpaǵan. Birqatar batys eliniń kóshbasshylary ushaqtyń apatqa ushyraýy zymyran soqqysyna baılanysty bolýy múmkin ekenin aıtty. Osyǵan deıin bul málimetti Iran úkimeti joqqa shyǵarǵan edi. Jumada New York Times gazeti Boeing ushaǵyna zymyrannyń dóp tııý sáti kórestilgen vıdeony jarııalady. Osydan keıin Iran ýkraınalyq ushaqty baıqaýsyzda qulatqanyn moıyndady.