Qyzylorda qalasyndaǵy «Jumyspen qamtý ortalyǵy» jańa ǵımaratqa kóshti. Bul týraly qalalyq ishki saıasat bólimi habarlady.
Ortalyq buǵan deıin qalalyq jumyspen qamtý jáne áleýmettik baǵdarlamalar jáne azamattyq hal aktilerin tirkeý bólimimen bir ǵımaratta jumys istep kelgen edi. Jańa formattaǵy Ataýly áleýmettik kómekke (AÁK) qujat qabyldaýǵa oraı bul mekemeler arqyly qyzmet alýshylardyń sany birneshe esege ulǵaıyp, ǵımarattyń tarlyǵy sezile bastaǵan bolatyn.
Osyǵan baılanysty kóp balaly analardyń suranysyn qanaǵattandyrý, kelýshilerge jaıly jaǵdaı jasaý maqsatynda qala ákimi Nurlybek Nálibaevtyń tapsyrmasymen Jumyspen qamtý ortalyǵy jalpy aýmaǵy 750 sharshy metr bolatyn ǵımaratqa kóshirildi.
«Baqytty otbasy» ataýymen «OPEN SPACE» formatynda óz jumysyn bastaǵan bul ortalyqta qyzmet alýshylarǵa barlyq jaǵdaılar jasalǵan, 150 adamǵa arnalǵan kútý zaly, balalarǵa arnalǵan oıyn buryshy bar.
Ortalyqta jumyssyz azamattardy jumyspen qamtý, az qamtylǵan otbasylarǵa kásipkerlik bastamalar men kásiptik baǵdar berý, memlekettik baǵdarlamalar aıasynda granttyq qarjylar qarastyrý, qaıta daıarlaý kýrstaryn uıymdastyrý jumystary júzege asyrylady. Aldaǵy ýaqytta ortalyqtan zańger men psıholog maman keńes beretin oryn, Analar bólmesin ashý josparlanýda.
Jalpy jyl basynan qalalyq «Jumyspen qamtý ortalyǵy» jańa formattaǵy ataýly áleýmettik kómekke 700-den astam ótinim qabyldasa, «Jastar tájirıbesi» arqyly 125 jasqa, áleýmettik jumyspen qamtý arqyly 80 adamǵa, 450 azamatqa qoǵamdyq jumysqa jáne 250-den astam qala turǵynyna turaqty jumys oryndaryna joldama bergen.