Búgin Ystambul soty «Ergenekon» isiniń 15 fıgýrantyn memlekettik tóńkeristi daıyndaǵandary úshin ómir boıyna túrmede otyrý jazasyna kesti. Bul týraly ITAR-TASS habarlady.
Sottalǵandardyń ishinde Túrkııa bas shtabynyń burynǵy bastyǵy general Ilker Bashbýg ta boldy. Oǵan «memlekettik tóńkeristi jasaýǵa áreket etkeni úshin» degen aıyp taǵyldy. Odan basqa taǵy on ofıser men general ómirlik qapas merzimine qamaldy. Olardyń arasynda jandarmerııanyń, birinshi jaıaý ásker armııasynyń qolbasshylary, ártúrli ásker bólimderiniń ókilderi bar.
Jalpy, bul is boıynsha 275 adam tergeýden ótti. Olardyń 66-sy prokýratýranyń sheshimi boıynsha qamaýǵa alyndy. Ázirge olarǵa baılanysty úkim shyǵarý jalǵasyp jatyr.
«Ergenekon» - bylaısha «kóleńkedegi úkimet» atanǵan qupııa ýltraulttyq uıym. Onyń nege «Ergenekon» atanǵany da túsinikti. Tarıhı derekter boıynsha, Ergeneqon, erteden kele jatqan ańyzdar boıynsha, Altaı taýynyń bir múıisinde ornalasqan ejelgi túrkilerdiń ujmaqtaı bolǵan qasıeti mekeni, alǵash ónip shyqqan orny bolyp tabylady. Materıaldar boıynsha, bul uıymnyń maqsaty 2003 jyly premer-mınıstr Taııp Erdogannyń úkimetin taqtan taıdyrý bolǵan. Osyǵan baılanysty tergeý 2007 jyly bastaldy. Bul jumystar qoǵam tarapynan qatty synǵa ushyrady. Bılik partııasyna qarsylar jaǵy muny Erdoganǵa qolaısyz, jaqpaıtyn tulǵalardy «qurtyp» jiberýdiń amaly sanaıdy.
Sáken Maılybaı.