Munyń sońy shetelden kelgen qonaqtardyń elimizge degen senimine selkeý túsiretinin kórip júrmiz. Nege deısiz ǵoı. Tarqatyp aıtaıyq.
Sońǵy kezde adamdardy alańdatqan, qoǵamdy qobaljytqan oqıǵalar az bolyp turǵan joq. Elordany qursaýyna alǵan boran, Almatyny qaıta-qaıta silkip ótken zilzala, irgemizdegi kórshige kelgen indet, osynyń barlyǵy da adamzattyń tabıǵat aldyndaǵy dármensizdiginiń bir belgisi ǵana. Sebebi Jaratqan ıemiz adamdardyń ımany men nápsisin tarazyǵa salyp otyratyn sebepterdi udaıy aldan tosady. Búkil ǵalamdy bir tarynyń qabyǵyna syıdyra alatyn tylsym qudirettiń pendelerine bergen synaǵynan sytyldyryp shyǵaratyn jalǵyz jol – saýapty is.
Kez kelgen kúrdeli jaǵdaıda adamdar óz qylyǵynan pıǵylynyń aınasyna qaraıdy. Máselen, qazir soltústik oblystardaǵy omby qarda qańtarylǵan kólikterdi shyǵarysyp, joldardy kúrep, qar qursaýynda qalyp qoıǵan jandarǵa tamaq tasyp júrgenderdi kórgende júregiń jylynyp, tirshiliktiń máni tabylǵandaı kúı keshesiz. Máselen, byltyr da el astanasyn aıaz qysqanda keıbir kólikterdiń jolaı tegin adam tasyp júrgenin estip, jasasyn adamdyq dep qýanǵanymyz este. Esesine qaqaǵan aıazdy kúnderi amalsyz jolǵa shyǵýǵa, jumysqa barýǵa májbúr bolǵandardyń muqtajdyǵynan eselep paıda tabýǵa umtylǵan taksılerdiń qylyǵy janymyzdy jaýratady.
Taksı degennen shyǵady. Kez kelgen memleket áýejaıdan bastalady. Ushaqtan túskende Sizdi áýejaıdan sol halyqtyń ókilderi, kelbeti, aýa raıy, mádenıeti kútip turady.
Aqıqatyn aıtý kerek, buryn Almatyǵa aıaǵymyz tıgende jan-jaqtan taksıler qolyńnan tartqylap, antalaǵanda qaıda qashyp qutylaryńdy bilmeı, yńǵaısyz kúı keshsek te qalypty jaǵdaı, ıakı el ishindegi usaq-túıekterdiń biri dep qarap keldik. Ushaqtan ózińmen ilese túsken sheteldik qonaqtardyń aldynda qaradan qarap turyp qysylasyń. Árıne qazir áýejaılarda bıznestiń mundaı jabaıy túri rettelip keledi. Osydan burynǵy eki-úsh jylmen salystyrǵanda tártip bar. Alaıda, adamdardyń ashkózdiginen bolǵan keleńsiz jaıttar áli de bar. Keıbireýler muny álmısaqtan kele jatqan pendeshilik arpalys der. Biraq temir tártip, qatań zań ǵana mundaı beı-berekettikti júıelendire alady.
Almatyda byltyr taksı júrgizýshisi sheteldik qonaqty halyqaralyq áýejaıdan baratyn jerine jetkizip, baqandaı 33 myń teńgesin qaǵyp alǵany biraz qoǵamdyq pikir týǵyzǵanyn bilemiz. Bul oqıǵa aldymen áleýmettik jelini qoldanýshylar arqyly jarııa boldy. Sol sııaqty kelesi júrgizýshi klıentinen 15 myń teńge alyp, «Regıon» degen kompanııa atynan jalǵan túbirtek berip ketken.
Asyǵystyǵymyzdy paıdalanyp, áýejaıǵa ákesiniń qunyn suraǵandaı qymbatqa áketip bara jatqan kólik júrgizýshisinen osy qanaǵatsyzdyqtyń túp-tórkinin bilgenimizde: «Byltyr meniń bir tanysym sheteldik sportshylardy áýejaıdan Dostyq dańǵylynyń joǵary jaǵyndaǵy «Royal Tulip» qonaqúıine 25 myń teńgege jetkizgen» dep, jerden jeti qoıan tapqandaı qýana «málimdedi».
Týrızm – birinshi kezekte shetelden kelgen qonaqtyń qaýipsizdigi, bas amandyǵy. Esiginen enbeı jatyp, alaıaq taksıleri qaltańdy sypyryp alatyn elge adam kele me?!
Máselen, Almaty halyqaralyq áýejaıynyń baspasóz qyzmeti joǵaryda sheteldik qonaqtardyń 15, 33 myń teńgesin qaltasyna basqan taksılerdiń izdestirilip jatqany jaıly habar taratty, biraq nátıjesi belgisiz.
Ras, osyǵan deıin áýejaıdaǵy taksı qyzmeti júıelenbegen bolatyn. Búgingi tańda áýejaıǵa taksı qyzmetin usynǵysy kelgenderge talap ortaq. Tek patenttelgen jáne tirkelgen kólikterge ǵana oryn bar. Sondyqtan sarapshylar taksı qyzmeti úshin tarıftik baǵany da bir júıege keltirý kerektigin aıtady. Sol kezde qala qonaqtary ynsapsyz kólik júrgizýshileriniń qaqpanyna túspes edi.
«Jol muraty – jetý» demeı me? Dittegen jerine jetkenshe jolaýshynyń taǵdyry júrgizýshiniń qolynda. Qashan da amanatqa qııanat júrmeıdi. Taksı de kóligine otyrǵan jolaýshyny jaratýshynyń amanaty dep túsinýi kerek.