Dana Abaıdyń 175 jyldyq mereıtoıy aıasynda Semeı qalasyndaǵy fızıka-matematıka baǵytyndaǵy Nazarbaev Zııatkerlik mektebiniń ustazdary aqynnyń qalamynan týǵan ándi shyrqady, dep habarlady atalmysh mekteptiń baspasóz qyzmetinen.
Olar osy arqyly artyna óshpes mura qaldyrǵan Hákimniń shyǵarmashylyǵyn nasıhattaýdy maqsat etip otyr. Uly oıshyldyń syrly da sazdy lırıkaǵa toly «Jelsiz túnde jaryq aı» ánin naqyshyna keltire oryndaýda mektep basshylyǵy men ujymdaǵy er-azamat ustazdar asa belsendilik tanytqan.
Estafetany qalamyzdaǵy Abaı atyndaǵy qazaq sazdy drama teatry, F.Dostoevskıı atyndaǵy orys drama jáne «Darıǵa - aı» jastar teatrlary ujymdarynyń birlese oryndaǵan áýenderinen keıin qabyl aldyq. Atalǵan teatr úshtigi oıshyl ánderin oryndaý bastamasyn búkil qazaqstandyqtarǵa joldapty. Biz Abaı atamyzdyń ánin shyrqaý arqyly aqynǵa shyǵarmashylyǵyna degen qurmetimizdi bildirgimiz keldi. Maqsatymyz – jastarǵa, shákirtterimizge jol kórsetý, oı salý. О́ıtkeni, Abaıdyń týyndylary – ómirsheń mura. Keleshekke de erkin jeterine kúmán joq, - deıdi mektep dırektory Baǵdan Qaıyrjanov.
Mektep ujymy óner ordasy bolmasa da, ándi jandy daýysta oryndap shyqty. Igi bastamany О́skemen, Pavlodar qalalaryndaǵy Nazarbaev Zııatkerlik mektepterine joldaǵan semeılikter chellendjdiń keń qoldaý tabaryna senimdi.