О́tken jyly Qyzylorda oblysynyń Qazaly aýdanynda jalpy quny 2 mlrd 255 mln.teńgeni quraıtyn 256 jobaǵa nesıe berilgen. Bul týraly Kásipkerler palatasynyń baspasóz qyzmeti habarlady.
Palata ókilderi men aýdan kásipkerleriniń kezdesýinde aımaqta salany damytý baǵytyndaǵy bastamalar jaıly da, bıznestiń máseleleri týraly da aıtyldy.
Aýdanda kásippen aınalysýǵa nıetti azamattar qatary ýaqyt ótken saıyn kóbeıip kele jatqandyǵy baıqalady. Qazir jumys istep turǵan kásipkerlik sýbektileriniń sany 4302-ge jetken.
Byltyr aýdandaǵy 250 azamat 106,7 mln.teńge memlekettik qaıtarymsyz qarjyǵa qol jetkizipti. Sondaı-aq jalpy quny 2 mlrd 255 mln.teńgeni bolatyn 256 jobaǵa memlekettik baǵdarlamalar aıasynda jeńildetilgen nesıe alynǵan.
О́tken jyly 600 qazalylyq «Bastaý», «Jas kásipker» jobalary boıynsha oqyp biliktilikterin jetildirse, 169 turǵyn «Bıznes-keńesshi» oqý kýrsyna qatysqan.