Qazaqstannyń alty boksshysy Majarstannyń Debresen qalasynda ótip jatqan Ishtvan Bochkaıdy eske alýǵa arnalǵan halyqaralyq týrnırdiń shırek fınalyna shyqty.
Atap aıtsaq, 52 kılo salmaqtaǵy Mahmýd Sabyrhan rıng qojaıyny Nandor Sokaǵa san soqtyrdy. 69 kılo salmaqtaǵy Talǵat Sháıken botsvanalyq Kapıng Shıpanǵa shań qaptyryp ketti. Sol sekildi aǵaıyndy Oralbaılardyń da ústemdigi esh kúmán týǵyzǵan joq. 81 kılo salmaqtaǵy Nurbek aýstrııalyq Habreze Mobınnen aılasyn asyrsa, 91 kılo salmaqtaǵy Aıbek Belarýs eliniń ókili Vladıslav Smıaglıkovtan basym tústi. Asa aýyr salmaqta aıqasqan Damır Toıbaı Eýropa chempıonatynyń qola júldegeri, fransııalyq Jamılı-Dını Aboýdý Moındzeniń osal tusyn ońaı taýyp, barsha kórermenniń ystyq yqylasyna bólendi.
Shırek fınalǵa joldama alǵan taǵy bir qandasymyz Aıdos Arapov osydan bir táýlik buryn Botsvanadan kelgen Maıteva Tefoǵa tize búktirgen edi.
О́kinishke qaraı, qos órenimiz úshin bul jarys aıaqtaldy. 63 kılo salmaqtaǵy Sanatáli Tóltaev álem chempıonatynyń qola júldegeri, Eýropa oıyndarynyń júldegeri, Belarýstiń betkeustary Dmıtrıı Asanovqa jol berse, 75 kılo salmaqtaǵy Ermahan Jaqpekov fransııalyq Vıktor Iokaǵa ese jiberdi.