Búgin «Aral-Sarybulaq» toptyq sý qubyryn paıdalanýshy Qazaly fılıalynyń №1 nasos stansasynan Áıteke bı kentindegi jańadan turǵyn úıler salynǵan 2 kvartal aımaǵyna aýyz sý berildi. Bul týraly aýdan ákiminiń baspasóz qyzmeti habarlaıdy.
Osydan 3 jyl buryn kenttiń osy aýmaǵynan turǵyndarǵa úı salý úshin 56 gektar jer berilgen bolatyn. Qazir munda 80-ge jýyq baspana bar. Osyǵan deıin jol salynyp, elektr jaryǵy men gaz jelisi júrgizilgen. Sheshimin tappaǵan tek aýyz sý ǵana bolatyn. Mine, búginde respýblıkalyq jáne oblystyq bıýdjetten qarjy bólinip, aýyz sý servıstik jelige qosyldy. Bul osyǵan deıin sýdy syrttan tasyp ishken turǵyndar úshin jaqsy jańalyq.
Osyǵan oraı ótken sharada aýdan ákimi Murat Ergeshbaev turǵyndardy sapaly aýyz sýmen qamtý baǵytynda atqarylyp jatqan jumystarmen tanystyrdy.
– Halyq úshin sapaly aýyz sýǵa qoljetimdiliktiń mańyzy óte zor. Sondyqtan bul máseleni biz kún tártibinen túsirgen emespiz. Búginde aýdan ortalyǵynan shalǵaı jatqan eldi mekenderge deıin sý jelilerin tarttyq. Endi birtindep barlyq aýyldardy servıstik jelige qosý úshin jumys jatyrmyz. О́tken jyly Ú.Túktibaev aýyly men Jalpaq eldi mekeni servıstik jelige qosyldy. Endi bizde 3 eldi meken qaldy. Buǵan tıisti qujattary daıyndalyp, qarjylandyrý úshin bıýdjettik ótinim tapsyrylǵan. Qazir qarjylandyrylýyn kútip otyrmyz, – dedi Murat Nálqojauly.