Qyzylorda qalasynyń ákimi Nurlybek Nálibaev shahar turǵyndary aldynda qorytyndy esep berdi. A. Toqmaǵanbetov atyndaǵy qalalyq mádenıet úıinde ótken kezdesýge oblys ákimi Qýanyshbek Ysqaqov, Indýstrııa jáne ınfraqurylymdyq damý birinshi vıse-mınıstri Qaıyrbek О́skenbaev qatysty.
Qala basshysy sózin uzaǵan jylda tarıhı shahar turǵyndarynyń áleýmettik máselelerin sheshý baǵytynda atqarylǵan sharýalardan bastady. Byltyr qala bıýdjeti 42,9 mlrd teńge kóleminde bekitilip, jyl sońynda ol 77,3 mlrd teńgege jetti.
Aýmaǵyna qala tóńiregindegi birneshe aýyl kiretin shaharda egin sharýashylyǵy men mal sharýashylyǵynyń kórsetkishi jyl saıyn artyp keledi. Byltyr bul saladaǵy ónim kólemi 8 mlrd teńgeden asqan. Aýylsharýashylyǵyn ártaraptandyrý baǵytyndaǵy jumystar qarqyn alyp, kúrishten 20 myń 885 tonna ónim jınaldy.
«Nurly jer» memlekettik baǵdarlamasyn júzege asyrýǵa 18,3 mlrd teńge bólinip, 1046 qyzylordalyq baspanaly boldy. Sońǵy jyldary boı kótergen sol jaǵalaý, shet aımaqtar, Báıterek, Qyzyljarma, Ál-Farabı, Saıahat móltek aýdandarynyń ınjenerlik-kommýnıkasııalyq ınfraqurylymy nyǵaıtyldy.
Ákim esebinde negizgi kapıtalǵa salynǵan ınvestısııa kólemi 156 mlrd. 441 mln teńgeni qurap, 110,7 paıyzǵa artqany aıtyldy. Byltyr atqarylǵan qurylys jumystarynyń kólemi 53 mlrd. 330 mln teńgege jetken.
Osy kúni qalany gazben qamtý kórsetkishi 95 paıyzǵa oryndalyp tur. Byltyr qala mańyndaǵy Qaraýyltóbe aýylynyń turǵyndary kópten kútken kógildir otynǵa qol jetkizse, osy jyly Aqsýat aýyldyq okrýgine gaz jetkizý josparda bar.
Qala bıýdjetiniń basym bóligi – bilim salasyna bólingen. Bilimdi urpaq tárbıeleý búgingi kúnniń negizgi mindeti. Bul turǵyda Qyzylorda qalasynda ótken jyly kóptegen jumystar atqarylǵan.
Máselen, byltyr qala mektepterindegi oryn tapshylyǵyn sheshý maqsatynda eki mekteptiń janynan qosymsha 150 oryndyq ǵımarat salyndy. Jappasbaı batyr kóshesiniń boıynan 600 oryndyq jańa mektep boı kóterdi. «Aqsýat» aýyldyq okrýginde balabaqsha el ıgiligine paıdalanýǵa berildi.
- Turǵyndar suranysyna sáıkes, «Saıahat», «Báıterek», SPMK turǵyn aýdandarynda jańa mektepter salynady. 320 oryndyq balabaqsha jaqyn kúnderi paıdalanýǵa beriledi. Jyl saıyn qala bıýdjetiniń basym bóligi bilim salasyna baǵyttalady. Qala mektepteri jańa oqýlyqtarmen 100 paıyz qamtamasyz etildi. 7 myńǵa jýyq oqýshy qoǵamdyq kólikterde tegin júrýge múmkindik aldy. Qalaǵa jaqyn ornalasqan eldi mekenderden qala mektepterinde qatynap oqıtyn 630 balany arnaıy kólikterdiń tasymaldaýyna jaǵdaı jasaldy. Osy jumystar bıyl da jalǵasady, – dedi qala ákimi.
Shahar basshysy kezdesýde osy jylǵy sheshimin tabatyn máselelerge de toqtaldy.
Habarlamadan keıin jınalǵandar ákimge saýal qoıyp, usynystaryn aıtty. Kezdesýdi oblys ákimi Qýanyshbek Ysqaqov qorytyndylady. Ol qalada atqarylyp jatqan jumystarǵa oń baǵa berdi, sonymen qatar, qoǵamdyq kólik, turǵyn úı salý úshin alynǵan jer telimderiniń paıdalanylýy, shet aımaqtardaǵy jol sekildi máselelerdi sheshýdi tapsyrdy.
Qyzylorda oblysy