Aqpannyń 21-22 kúnderi «Darıǵa-aı»» jastar teatry Muhtar Áýezovtyń «Ǵajaıyp tragedııasy» spektakliniń tusaýkeserin ótkizbek. Spektakl uly aqynnyń ómir joly men shyǵarmashylyq jolyn baıandaıdy.
Daıyndyǵy tórt aıǵa sozylǵan qoıylymǵa 13 akter qamtylǵan. Al sahna dekorasııasyna astanalyq mamandar shaqyrylǵan. Spektakl rejısseri Gaýhar Adaıdyń aıtýynsha, akterlerge qoıylǵan basty talap, keıipkerlerdiń syrt beınesin aınytpaı berý emes, óz sheberlikteri arqyly olardyń minez-qulqyn, jan dúnıesin kórermenge shynaıy jetkize bilýleri qajet. Semeı aqparattyq ortalyǵynyń habarlaýynsha, qoıylymnyń taǵy bir ereksheligi - jandy daýys eken. Akterlerdiń oınaý sheberligin tereń uǵyný úshin kórermenge uıaly telefondaryn sóndirip qoıýǵa týra keledi.
- Biz sahnadaǵy kórinister arqyly kórermenderge oqıǵa jelisi boıynsha beligili bir baǵytty nasıhattaýdy maqsat etpedik, - dedi rejısser Gaýhar Adaı, - tek aýdıtorııany tereń oıǵa jetelep, naqty bir túıin túıýge jeteleı alsaq degendi oıǵa aldyq. Abaı beınesin somdaıtyn ártiste kózimiz úırengen aqyn beınesindegi saqal, basqa da bet-álpet uqsastyǵy bolmaıdy. Bizdiń ártister keıipkerler beınesin kelbet uqsastyǵymen emes, ózderiniń akterlik qarym – qabiletterin, obrazdy somdaýdaǵy akterlik sheberlikteri arqyly kórsetetin bolady. Osynyń bárin tereń uǵyný úshin uıaly telefondardyń óship turǵany durys bolar edi.
Al akterlar úshin uly jerlesteriniń rólderin shynaıy túrde sahnalaı bilýleri – úlken synaq. Abaı beınesin somdaıtyn Erkebulan Nuǵymanovtyń oıynsha, Abaı rólin oınaý zor qurmet ári úlken jaýapkershilik.
- Kez kelgen akter ózine berilgen keıipkerdi shynaıy beıneleýge tyrysady. Al, Abaı beınesin somdaý akter úshin zor baqyt, úlken jaýapkershilik. Kórermenderdi shynaıy talantymyzben tánti ete bilsek dep barynsha tyrysýdamyz. Áriptesterime tek qana tabys tileımin,- deıdi Erkebulan Nuǵymanov.
Semeı aqparattyq ortalyǵyyń málimetinshe, spektakldiń tusaýkeseri aqpannyń 21-22 kúnderi ótpek. Sol kúni teatrdyń negizin qalaýshy professor Darıǵa Turanqulova men jazýshy-dramatýrg Asylbek Yqsan, basqa da ataqty adamdar keledi dep kútilýde. Sonymen birge qalamyzdyń teatr ujymdary Abaı Qunanbaevtyń mereıtoıyna oraı aldaǵy ýaqyttarda oblys boıynsha gastrolge shyǵýdy da josparlap otyr.