Jýyrda Abaı atyndaǵy Qazaq ulttyq pedagogıkalyq ýnıversıtetinde Respýblıkalyq oqý-ádistemelik Keńesi «Pedagogıkalyq ǵylymdar» bilim berý salasyndaǵy Oqý-ádistemelik birlestiginiń «Arnaıy pedagogıka boıynsha kadrlar daıarlaýdyń mazmundy aspektileri» taqyrybynda kezekten tys májilisi ótti.
Májilisti ashqan Abaı atyndaǵy QazUPÝ rektory Takır Balyqbaev sharanyń mańyzdylyǵyn atap ótti. «Búgingi tańda bilim berý jáne pedagogıkalyq kadrlardy, sonyń ishinde arnaıy pedagogtardy daıarlaýda ózekti máseleler kóp. Memleket basshysy Qazaqstan halqyna arnaǵan «Syndarly qoǵamdyq dıalog - Qazaqstannyń turaqtylyǵy men órkendeýiniń negizi» Joldaýynda múmkindigi shekteýli balalardy qoldaý, ınklıýzıvti qoǵam qurý bizdiń jumysymyzdyń basym baǵyttarynyń biri bolýy tıis dep málimdedi. Búgingi tańda joǵary defektologııalyq bilim berýdiń tıimdiligin joǵarylatýdyń ózektiligi arnaıy jáne bilim berý mekemelerindegi múmkindigi shekteýli balalarmen jumys jasaýdaǵy muǵalimderdiń aımaqtyq qajettilikterin eskere otyryp, ony ıkemdi jáne jyldam qaıta qurý úshin reformalaý máselesin sheshedi. Bul jaǵdaıda joǵary bilim júıesiniń defektologııamen jáne arnaıy bilimmen ózara árekettesý mehanızmin jasaý qajet», dep atap ótti rektor.
Rektor sonymen qatar ınklıýzıvti bilim berý júıesi tek elimizde ǵana emes, búkil álemde de ózektiligine toqtaldy. Onyń aıtýynsha, bilim berýdi izgilendirý oqytý men tárbıeleý úderisinde balanyń damýyna, tanymdyq qyzyǵýshylyǵy men jeke basynyń damýyna yqpal etetin oqytý ádisteri men formalaryn qoldanýdy talap etedi. Al qoǵamdastyqty damytýdyń negizgi prınsıpi-árbir adamnyń ózderiniń bilim alý qajettilikterin qanaǵattandyrý jáne sapaly bazalyq bilim alý quqyqtaryn qamtamasyz etý. Bul máseleni iske asyrý barysynda obektıvti kedergiler bar, mysaly, defektologtardyń, logopedterdiń, tárbıeshilerdiń jáne kóp deńgeıli baǵdarlamalardyń jetispeýshiligi, erekshe kútimdi qajet etetin balalarmen qarym-qatynas jasaýdaǵy muǵalimniń kásibı biliktiliginiń tómendigi, materıaldyq bazasy álsiz, ınklıýzıvti bilim berý jaǵdaıynda pedagogıkalyq prosesti josparlaý, uıymdastyrý, jobalaý jáne damytý jáne t.b. sýbektıvti sebepterdiń kúsheıýine baılanysty ádistemelik daıyndyqtyń jetkiliksizdigi. Jalpy, eldegi ınklıýzıvti bilimniń qajettilikterin eskere otyryp, osy bilim berý úderisine qatysýshylardyń kásibı quzirettiligin damytýǵa baǵyttalǵan oqytý júıesi jetildirýdi qajet etedi.
Is-shara barysynda ýnıversıtet professor-oqytýshylar quramynyń «Arnaıy pedagogıka» mamandaryn daıarlaý baǵyty jáne ınklıýzıvti bilim berý boıynsha oqý-ádistemelik jáne ǵylymı eńbekteriniń kórmesi uıymdastyryldy.
ALMATY