«Bir qyzyq isim eken sum jalǵanda...» dep uly Abaı aıtqan saıatshylyq ónerdiń saıysy jeksenbi kúni Soltústik Qazaqstan oblysyndaǵy Beskól selosynyń «Qulager» atty ıppodromynda aıaqtaldy. Ol resmı túrde búrkit, suńqar, qarshyǵa ónerleriniń respýblıkalyq chempıonaty dep atalǵan.
Úsh kúnge sozylǵan saıys qus ıeleriniń ǵana emes jalpy teristik halqynyń qyzyqtaǵan tamasha qyzyǵyna aınaldy. Bul kúnderi aýa-raıy da jylymyq bolyp, saıysty tamashalaýǵa kelgenderdi búrseń qaqtyrmady.
Búrkitshiler elimizdiń on aımaǵynan kelgen eken. Atap aıtar bolsaq, Nur-Sultan men Shymkent qalalarynan, Aqmola, Almaty, Jambyl, Qaraǵandy, Pavlodar, Mańǵystaý, Shyǵys Qazaqstan oblystarynan. Sondaı-aq jarysty ózinde ótkizýshi Slltústik Qazaqstan oblysynyń saıatshylary qatysty.
Jarys úsh kezeńmen ótkizildi. Alǵashqysy: ushyrylǵan qustyń saıatshy ıesiniń qolyna dybystap shaqyrǵanda qaıta kelip qonýy. Ekinshi kezeńde qustyń erkin ushýy tamashalanyp, baǵalandy. Eń sońynda qarshyǵa men suńqardyń qoıan men kepterge, al búrkittiń shapqan at súıregen túlkiniń terisine týra túsýi synaldy. «Tomaǵasyn tartqanda bir qyrynan» qaıqań qaǵyp aspanǵa kóterilgen qustyń qanat-qıryǵy sýyldap, tómen shúıilgeniniń ózi keremet kórinis eken.
Jarys qorytyndysy boıynsha Túrkistan oblysynan kelgen Dáýren Arshabaıdyń suńqary birinshi oryn aldy. Al Almaty oblysynan kelgen Almas Seıitjannyń qarshyǵasy aldyna eshqaısyn salmady. Ol ushyrylǵan kepterlerdi jarq etkizip, qaqshyp tastap otyrdy. Búrkitter arasynan birinshi oryndy Mańǵystaý oblysynyń Tastúlegi aldy. Búrkitshi Aıshýaq Taımanovtyń bul qusy da alǵyr, naǵyz zar shaǵynda eken.
Jarysqa qatysqandardyń bárine, onyń ishinde jeńimpazdarǵa laıyqty júldeler berildi.
Soltústik Qazaqstan oblysy