О́tken aptanyń sońynda Dýbaıdaǵy týrnırdiń fınalynda óner kórsetken qazaqstandyq tennısshi Elena Rybakına sol mejege jetkeni úshin 372 200 AQSh dollary kóleminde syıaqy aldy.
Osylaısha, jerlesimizdiń tapqan tabysy 1 mıllıondyq mejeden asty. Naqtylap aıtsaq, bul kúnderi álemniń 17 raketkasy atanyp otyrǵan Elena túrli týrnırdegi óziniń aıshyqty óneriniń arqasynda 1 164 376 dollardy qaltaǵa basty.
Bir ǵajaby, bul kúnderi Dohada ótip jatqan týrnırdiń alǵashqy aınalymda rýmynııalyq Sorana Kyrstıany úsh settik saıysta utqan ol 2020 jyly jalaýy jelbiregen WTA jarystarynda jeńisteriniń sanyn 20-ǵa jetkizdi. Buǵan deıin dál osyndaı nátıjege osydan baqandaı 11 jyl buryn reseılik Elena Dementteva qol jetkizgen edi. Sonymen qatar Rybakına Qazaqstannyń týy astynda óner kórsetken kezeńde WTA týrnırlerinde bir márte bas júldeni oljalap, úsh ret fınalǵa shyqty.
Katardyń bas shaharynda ótip jatqan dúbirli dodanyń ekinshi aınalymynda Elena Rybakına álemniń 62 raketkasy belgııalyq Alıson van Ýıtvankpen sheberlik baıqasady.