Buǵan deıin Qyzylordadaǵy úıinen 15 aqpan kúni shyǵyp ketken kásipker Tynymbaı Bajenovtyń habarsyz ketkendigin, osyǵan baılanysty jaqyndarynyń aryzy Qyzylorda QPB-da tirkelip, izdeý jumystary júrip jatqandyǵyn habarlaǵan bolatynbyz.
Polıseıler habarsyz ketken azamatty izdeý úshin arnaıy top quryp, oǵan eriktiler de qosyldy. Keıinirek bul top qatary tótenshe jaǵdaılar jónindegi departament kúshterimen tolyqty. Biraq, izdeý jumystary áli nátıje berer emes. Soǵan qaramastan, Syrdarııa ózeninde izdestirý jumystary da áli jalǵasýda.
Oblystyq prokýratýra men polısııa departamentiniń basshylary osy máselege baılanysty arnaıy jıyn ótkizdi. Osy oqıǵaǵa baılanysty 24 aqpanda oblystyq prokýratýranyń nusqaýyna sáıkes QR QK 99-babymen is qozǵaldy. Qazirgi tańda tıisti tergeý amaldary júrgizilýde.
Qalǵan málimetter Qylmystyq-prosestik kodekstiń 201-babynyń talabyna sáıkes jarııa etilmeıdi. Qylmystyq is oblystyq prokýratýra, polısııa departamenti basshylarynyń baqylaýynda tur.