Almatylyqtar mekenjaı boıynsha turaqty tirkeýge turý úshin HQO-nyń onlaın balamasy – egov.kz tańdaı bastady.
Bıylǵy jyl basynan bergi kórsetkish boıynsha onlaın túrde mekenjeı tirkeýine turýshylar sany birshama ósken. Bul qyzmetti alý úshin 39 462 adam front-ofısterge júginse, 20 873 azamat eshqaıda barmaı-aq onlaın túrde ony júzege asyrǵan.
Byltyrǵy kórsetkishterdi esepke alatyn bolsaq, Almaty qalasyndaǵy «Azamattarǵa arnalǵan úkimettiń front-ofısteri arqyly 216196 adam, onlaın túrde 43967 adam tirkeý rásimin júzege asyrǵan.
Respýblıka boıynsha 1,5 mln adam front-ofıster arqyly, onlaın túrde 479 myń adam tirkeý rásimin júzege asyrǵan, sáıkesinshe ár tórtinshi azamat turǵylyqty tirkeý rásimin elektrondy túrde júrgizgen. Bul tizimde Almaty qalasy 7-orynǵa tirelip, 13,49 paıyzdy qurap otyr.
Aıta ketý kerek, 2019 jyldyń maýsymynan bastap azamattardy turǵylyqty jeri boıynsha tirkeý qyzmetterin pılottyq rejımde «Azamattarǵa arnalǵan úkimet» memlekettik korporasııasynyń qyzmetkerleri júzege asyrady.
«Pılottyq joba almatylyqtarǵa birqatar artyqshylyqtar berdi. Atap aıtar bolsaq, front-ofısterdiń jumys kestesine sáıkes azamattardy tirkeý boıynsha qyzmet kórsetý, ıaǵnı túski úzilissiz saǵat 9.00-den 20.00-ge deıin, kóshi-qon polısııasynyń derekter bazasynda tirkeýge múmkindigi bar qyzmetkerler sanyn arttyrý, tirkeý boıynsha qyzmetke kezekti qysqartý sııaqty úderisterdi qolǵa alýdyń arqasy», – deıdi «Azamattarǵa arnalǵan úkimet» MK KEAQ Almaty qalasy boıynsha fılıalynyń PR-menedjeri Jańyl Ápetova.
Búginde mekenjaı tirkeýin jasatý úshin tirkeýge qoıýshy jáne tirkelýshi taraptyń ESQ-sy bolýy tıis. Azamat egov.kz-ke tirkeletin mekenjaı men jeke málimetterin jazsa, baspana ıesi oǵan ruqsatty jeke kabınetine kelgen suraýdy maquldaý arqyly beredi.