Qurlyqtyq hokkeı lıgasynyń (QHL) Gagarın kýbogy jolyndaǵy jarystyń alǵashqy aınalymynyń ekinshi kezdesýinde «Barys» Magnıtogorskiniń «Metallýrginen» oısyraı utyldy.
Nur-Sultanda ótken básekeniń alǵashqy kezeńi óte qarqyndy ótkenimen, qos komanda bir-biriniń qaqpa kiltin taba alǵan joq. Úzilisten keıin bizdiń hokkeıshiler jıi qatelikke urynyp, bilgenderinen jańyldy. Bul jaǵdaıdy «Metallýrgtiń» oıynshylary utymdy paıdalandy. Ekinshi kezeńniń basynda qarqynyn kúrt kúsheıtken qonaqtar aınaldyrǵan eki-úsh mınýt aralyǵynda nysanany eki márte dál kózdedi. Bul goldardyń avtorlary – Andreı Nestrashıl (25 mınýt) men Sergeı Mozıakın (28 mınýt). Al 35 mınýtta joǵaryda esimderi atalǵan qos sańlaq taǵy bir keremet shabýyl uıymdastyrdy. Onyń aqyry Nestrashıl soqqan taǵy bir golmen aıaqtaldy. Esep – 0:3. Úshinshi kezeńde jerlesterimiz qansha jantalasqanymen, tablodaǵy esepti ózgerte alǵan joq.
Sóıtip, pleı-offtaǵy qos oıynnyń qorytyndysy boıynsha tarazy basy teńesti – 1:1. Endi «Barys» kelesi qos kezdesýdi 5 jáne 7 naýryz kúnderi Magnıtogorskide ótkizedi.