Pákistan Islam Respýblıkasynyń astanasy Islamabad qalasynda ótken Konfessııaaralyq dıalog jáne ulttyq birlik jónindegi halyqaralyq konferensııada Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevqa «Memleketke jáne qoǵamǵa sińirgen qyzmetteri úshin» bedeldi Halyqaralyq marapaty berildi.
Qazaqstannyń Tuńǵysh Prezıdentiniń halyqaralyq qaýymdastyqqa qosqan orasan zor úlesin moıyndaı otyryp, Islamabad Halyqaralyq ıslam ýnıversıtetiniń Islam zertteý ınstıtýty Keńesiniń bastamasymen Elbasynyń joǵary marapatyn Pákistan ulttyq assambleıasynyń spıkeri Asad Kaızer usyndy.
«Memleketke jáne qoǵamǵa sińirgen qyzmetteri úshin» halyqaralyq marapaty álemniń kórnekti qaıratkerlerin búkil adamzattyń múddeleri úshin birlikti, kelisimdi jáne qaýipsiz ómir súrýdi nyǵaıtýǵa qosqan zor úlesi úshin moıyndaıdy. Búgingi kúnge deıin qazirgi zamannyń eń kórnekti memleket, saıası jáne dinı qaıratkerleri, onyń ishinde Pákistan Islam Respýblıkasynyń eks-prezıdenti – Mamnýn Hýsseın, Dúnıejúzilik ıslam lıgasynyń bas hatshysy – Muhammed ál-Issa, Imam Muhammed Ibn Saýd atyndaǵy Islam ýnıversıtetiniń rektory – Súleıman Abba ál-Haıl, basqa da halyqaralyq jáne memleket qaıratkerleri marapatqa ıe boldy.
«Memleketke jáne qoǵamǵa sińirgen eńbekteri úshin» nagradasyn taǵaıyndaý jónindegi komıteti Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevty qazirgi memlekettiń negizin qalaýshy, reformator jáne strateg, ultaralyq jáne konfessııaaralyq tatýlyqtyń qazaqstandyq modelin qurýdaǵy absolıýtti kóshbasshy dep sanaıdy. Nursultan Nazarbaevtyń barlyq memleketter men qoǵamdar úshin beıbitshilik pen qaýipsizdik qundylyqtaryn alǵa jyljytýdaǵy irgeli úlesi, biregeı jahandyq konfessııaaralyq dıalog alańy – Álemdik jáne dástúrli dinder lıderleriniń sezin qurýynda, sonymen qatar beıbitshilik, kelisim, gýmanızm, toleranttylyq jáne dinaralyq kelisim negizinde ómir súrý ıdeıalaryn nasıhattaýynda, dep habarlady Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵy.