Oblystyq Qazaqstan halqy assambleıasynyń uıymdastyrýymen Dostyq úıinde «Uly dalanyń ultaralyq tili» atty kezdesý keshi bolyp ótti.
Aıta ketý kerek, ótken jyly táýelsizdik kúnine oraı elordada Qazaqstan halqy Assambleıasynyń uıymdastyrýymen memlekettik tildi damytýǵa baǵyttalǵan «Uly dalanyń ultaralyq tili» atty forým ótken bolatyn. Til týraly ádettegi jıyndardan ózgeshe formatta ótken forýmda qazaqshany óz tilindeı meńgergen ózge ult ókilderi basqalarǵa úlgi boldy. Forým aıasynda Qazaqstan halqy Assambleıasy tóraǵasynyń orynbasary Janseıit Túımebaev óńirlerge chellendj joldady. Osy chellendjdi syrboıylyqtar Túrkistan oblysynan qabyl aldy.
Kezdesýde «Qoǵamdyq kelisim» KMM dırektory Ýálıhan Ibraev QHA 25 jyldyǵy aıasynda qazaq tilin ultaralyq qatynas tiline aınaldyrý baǵytynda atqarylyp jatqan sharalar jaıly aıtyp ótti. Osy baǵytta Syr óńirinde «Myń bala» mádenı-aǵartýshylyq jobasy qarqyndy júrgizilýde. Dostyq úıinde tilderdi oqytý kabıneti jumys jasaıdy. Osy ýaqytqa deıin 100-ge jýyq bilim alýshy memlekettik til boıynsha bilimderin keńeıtti. Etnos ókilderi arasynda «Mámile» qazaq tili klýby arqyly sóıleý sheberligin arttyrý jumystary qolǵa alyndy.
Sonan soń Nazarbaev Zııatkerlik mektebiniń baspasóz hatshysy, til janashyry Elena Rybına sóz aldy. Ol jýrnalıstıkaǵa qazaqsha erkin sóıleýiniń arqasynda kelgenin aıtty. Bes jyldaı qalalyq telearna redaktory qyzmetin atqarǵan Lena qazir Nazarbaev zııatkerlik mektebiniń baspasóz hatshysy. Joldasym da qazaq tilinde óz oıyn erkin jetkize alady. Qazaq tilin mártebesin arttyrýǵa úlesimizdi qosý maqsatynda ekeýmiz aqyldasyp, ulymyzdy qazaqsha balabaqshaǵa berdik. Memlekettik tildi ultaralyq tilge aınaldyrý bastamasyna úles qosa beremiz,- deıdi Lena.
Qorqyt ata atyndaǵy QMÝ stýdenti Elena Pak Abaıdyń 200-den astam óleńin jatqa biledi, «Eskendir» poemasyn bastan aıaq múdirmeı aıtady. Onyń qazaqtyń tili men rýhanııatyna qyzyǵýshylyǵyn oıatqan ájesi Svetlana eken.
Kezdesý keshine kelgen qonaqtarǵa №9 orta mekteptiń muǵalimi, tatar etnomádenı birlestiginiń belsendisi Elena Ishkanova Abaıdyń «Kózimniń qarasy» ánin aıtyp berdi.
«Atameken» balalar aýylynyń tárbıelenýshileri Anna Nesterova men Vıktor Lenıvkın de qazaq tilin qalaı úırengenderin aıtyp ótti.
Orys tildi synyptarǵa qazaq tilinen dáris beretin lezgın qyzy Albına Gadırova «Men úshin qazaqy qaımaǵy buzylmaǵan Syr eliniń árdaıym orny bólek. Dál osy jerde men memlekettik tildi - qazaq tilin jetik meńgerip, armandaryma jaqyndaı tústim. Ákem qazaqtyń salt-dástúrin berik ustanyp ótti. Men de sol baǵyt-baǵdarmen, qazaq eline, tiline degen súıispenshilikpen óz jolymdy salyp kelemin. Meniń shákirtterim árdaıym oq boıy ozyq shyǵyp, respýblıkalyq, oblystyq deńgeıdegi ǵylymı jobalar saıysynan aldyńǵy oryndarǵa ıe bolyp keledi. Ulttyq biryńǵaı testileýden 25 baldan alyp, joǵary kórsetkishterge qol jetkizip júr», dedi.
Taǵylymy mol sharada sheshen etnomádenı birlestigi tóraǵasynyń orynbasary Iýsýp Saıdov qazaq tiline degen qurmetin bildirdi.
Syr óńiriniń til janashyrlary «Uly dalanyń ultaralyq tili» chellendjin Aqtóbe oblysyna joldady.